Бие биедээ итгэж, амьдралыг хамт туулна гэж байгаа бол гэр бүлээ бүртгүүлэх нь хууль ёсны үүрэг. Юутай ч та дараах болсон явдалд анхаарлаа хандуулна уу. Миний найз бүсгүй нөхөртэйгээ 15 жил амьдарч нэг хүүтэй болсон юм. Эхний жилүүдэд тэд эвтэй найртай,сайхан амьдарч байлаа. Гэтэл нөхөр нь архитай нөхөрлөж, ааш зан нь ч эвдрэх болов. Найз маань хүүхдээ өнчрүүлэхгүй гэсэндээ арван хэдэн жил алганы амтыг нь тэвчиж, засарна гэж битүү горьдсоор амьдарсаар байлаа. Эцэст нь нөхөр нь өөр хүүхэнтэй гэр бүл боллоо гээд хаяад явчихсан. Гэхдээ зүгээр ч явчихсангүй, хамт амьдарч байхдаа бий болгосон эд хөрөнгөө авна гэж заналхийлэх болов. Тэгэхээр нь найз маань аргагүйн эрхэнд эд хөрөнгийнхөө эрхийг хамгаалуулахаар шүүхэд хандсан юм.
Харамсалтай нь тэд гэрлэлтийн баталгаагүй байсан учир шүүх тэдний хамтын амьдралтай байсныг нь тогтоож, эхнэрт нь хашаа байшинг, нөхөрт нь машин, найман барааны дэлгүүрийг оноож. Уг нь тэр хоёр баталгаатай байсан бол эд хөрөнгийг нь тэнцүү хуваах байсан. Учир нь нөхөр эд хөрөнгийн ихэнхийг авсан нь ажил хийсэн цалин буюу орлогоороо хуримтлуулсан гэдэгтэй холбоотой. Эхнэр хүүхэдтэй хоцорсон учраас л шүүхээс хашаа, байшинг түүнд олгохоор шийдвэрлэсэн байна.
Хүүхэд өсгөх болон гэр ахуйн ажил үнэлэгддэггүй хөдөлмөр учраас төрийн хуулийн хамгаалалтад багтахын тулд та заавал гэрлэлтээ батлуулаарай гэж хуульч зөвлөж байна.
Хэрэв та хууль ёсоор гэр бүлээ батлуулбал
-Гэр бүлийн хуулийн дагуу бие биенээ тэжээн тэтгэх эрх, үүрэг үүснэ
-Өв залгамжлах эрхтэй болно.
-Тэжээгчээ алдсаны тэтгэвэр авах боломжтой
-Шилжилт хөдөлгөөн хийлгэх зэрэгт баталгаа тань баримт болно
Эцэст нь хэлэхэд, энэ бүх явдлыг гэрлэж амжаагүй хэн ч гэсэн мэдэхэд илүүдэхгүй.

2005.07.11, Инфо