Харин уран жолоодлогын тэмцээн өчигдөр Төв цэнгэлдэх хүрээлэнгийн дэргэдэх талбайд эхэллээ. Жолооч нар суудлын авто машин болон том оврын автобусаар ур чадвараа үзүүлэв. Тэмцээний суудлын автомашины төрөлд таксид явдаг зөвхөн Аксент маркийн 26 машин, хүнд оврын автобусны ангилалд Яармаг, Зүүн салаагийн чиглэлд нийтийн тээвэрт үйлчилдэг 16 тэрэг байлаа.

Жолооч хүний авхаалж самбааг сорьдог туг шүлжих, дугуй солих, 100 метрт хурд авах, богино зайд эргэх, гарашт орох зэрэг даалгавар уг тэмцээнд багтжээ. Энэ нь блон улсын хэмжээнд уран жолоодлогын тэмцээн явуулдаг үйлдлүүдийг оруулсан гэнэ. Түүнчлэн оролцогчдын нас болон мэргэжлийн ур чадварыг харгалзсангүй. Харин авто машины үзлэгт орсон байдал, жолоочийн эрүүл мэндийг үзэн оролцогчдыг бүртгэжээ. Сонирхуулахад суудлын тэргэний тэрөлд дөрвөн эмэгтэй жолооч авхаалж самбаагаа сорьсон юм. Тэд эрчүүдээс дутахгүй шуурхай, үйлдлүүдээ тун ч цэвэрхэн гүйцэтгэж байлаа. Харин манай зарим залуус хурд хэтрүүлснээс алдаа багагүй гаргасан.

Оролцогчдын дасгалаа гүйцэтгэх хугацаа дунджаар таван минут байв.
Тэмцээний аваргууд маргааш шагналаа авах бөгөөд тэргүүн байр нь алтан медаль 300 мянган төгрөг, Онц тээвэрчин цол тэмдэг юм. Удаах тамирчид мөнгө, хүрэл медаль өргөмжлөлийн эзэн болно. Мөн медалийн эзэд тодрох өдөр Төв цэнгэлдэх хүрээлэнд манай оронд ашиглагдаж байсан болон шинээр орж ирсэн авто машины цуваа болно.

Б.БАДМАА
(өдрийн сонин 2005-07-15 168)