Монгол, Японы Гадаад хэргийн яамд хоорондын зөвлөлдөх уулзалт 1996 оноос хойш нийт 6 удаа болж, түүний дотор сүүлчийн 2 уулзалтыг дэд сайдын хийж байгаа юм.
Энэ удаагийн зөвлөлдөх уулзалт Монгол улсын Гадаад хэргийн дэд сайд А.Баттөр, Японы Гадаад хэргийн дэд сайд Х.Танака нарын тэргүүлсэн төлөөлөгчдийн хооронд болов. Уулзалтын үеэр сүүлчийн зөвлөлдөх уулзалтаас хойшхи буюу 2003 оноос хойшхи Монгол, Японы харилцаанд үнэлэлт өгч, 2005, 2006 оны харилцаа, хамтын ажиллагааны чиглэл, тодорхой арга хэмжээ бүс нутгийн асуудал болон олон талт хамтын ажиллагааны талаар санал солилцов.
Х.Танака тэргүүтэй төлөөлөгчид Монгол Улсын Ерөнхийлөгч Н.Энхбаяр, Ерөнхий сайд Ц.Элбэгдорж, Гадаад хэрийн сайд Ц.Мөнх-Оргил нарт бараалхав. Мөн төлөөлөгчдөд УИХ дахь Монгол, Японы бүлгийн дарга Д.Ганхуяг, Гадаад хэргийн дэд сайд А.Баттөр зоог барив.
Уулзалтын үеэр Гадаад хэргийн дэд сайд А.Баттөр хоёр орны улс төрийн яриа хэлэлцээ дээд, өндөр хэмжээнд үргэлжилж, харилцан ойлголцол нэмэгдэж байгааг, мөн Монгол улсын эдийн засаг, нийгмийн хөгжилд Япон улсын Засгийн газрын хөгжлийн албан ёсны тусламж хувь нэмрээ оруулснаар ирснийг тэмдэглэж, талархал илэрхийлэв.
Японы тал Монгол улсын улс төр, эдийн засгийн өөрчлөлт, шинэчлэлийг цаашид ч дэмжиж туслахаа мэдэгдээд Япон улсын Засгийн газраас хэрэгжүүлэх хөгжлийн албан ёсны тусламжийн төлвийн талаар танилцуулав.
Хоёр тал цаашид өндөр, дээд хэмжээний айлчлалуудыг үргэлжлүүлэн хэрэгжүүлэх, мөн худалдаа, хөрөнгө оруулалтыг нэмэгдүүлэх, соёлын солилцоо, олон нийтийн харилцааг өргөжүүлэхээр тохиролцов.
Японы төлөөлөгчид НҮБ-ын шинэчлэл, түүний догор Аюулгүй Зөвлөлийн өргөтгөлийн асуудлаар өөрийн баримталж буй байр суурийн талаар мэдээлээд Монгол улс НҮБ-ын Аюулгүй Зөвлөлийн байнгын гишүүнээр сонгогдох Японы хүсэлтийг дэмжсээр ирсэнд талархаж байгаагаа илэрхийлээд Монгол улс Ази, Номхон далайн бүс нутгийн олон талт хамтын нийгэмлэгт оролцох хүсэл эрмэлзлийг дэмжиж байгаагаа мэдэгдэв. .

Ж.Алт

/Оллоо.МН/