мэдээлж буй зүйл гэвэл тус улсын Ерөнхий сайд байсан М.Касьяновын их луйврын хэрэг юм. ОХУ-ын Ерөнхий прокурорын газар М.Касьяноьвын их залилан, луйврын хэргийг нягтлан шалгаж тус улсын Эрүүгийн хуулийн хэд хэдэн зүйл ангиар эрүүгийг хэрэг үүсгэжээ. Н.Энхбаярын дотны анд хэмээн манай нэг бялдууч сэтгүүлчийн цоллосон М.Касьянов ямар хэрэг хийсэн бэ. Үүнийг үнэн баримтаар сонирхоцгооё.

Ц.Цэрэн

Миша-96 хувь
М.Касьяновыг Сангийн яамны сайд байхад нь Миша-2 хувь хэмээн хочилдог байжээ. Тэрбээр Ерөнхий сайд болохоосоо өмнө болсон хойноо ч Парисын клубын өр хуучин ЗХУ-ын гадаад өр авлага /үүнд нөгөө Монголын их өр гэгч багтана/ зэргийг барагдуулахдаа хоёр хувийг заавал хувьдаа завшдаг байсан тул /энэ нь баримтаар нотлогджээ/ ийнхүү Миша-2 хувь гэдэг хочтой болж Оросын шинэ үеийн түүхэнд авилга идэх талаараа М.Касьянов шиг тийм Ерөнхий сайд байгаагүй гэж Мишагийн хэргийг сөхөж тавьсан ОХУ-ын Төрийн Думын депутат, нэрт сэтгүүлч А.Хинштейн одоо М.Касьяновыг Миша-96 хувь гэж нэрлэх болсныхоо учрыг маш дэлгэрэнгүй тайлбарлаад ОХУ-ын Ерөнхий прокурорын газарт хандсаны дараа хүнгэсэн дуут, царайлаг Миша ялтны суудалд суух дээрээ тулжээ. Москвагийн баруун талд эрхэм дээдсүүдийн амьдардаг Тройце-Лыково нэртэй дүүрэг бий. Энэ нь Москва голын эрэг дээр байдаг. Бүр зөвлөлтийн үеэс энд нам төрийн удирдагчдын зуслан, харш байрласан хориотой бүс байжээ. Энэ нь Монголын сайд дарга нарын амьдардаг байсан Нүхтийн зуслангаас хэд дахин том, тансаг орд харштай, товчхон хэлэхэд, бүхэл бүтэн вант улс гэж болохуйц газар юм. Энд уг нь улсын мэдлийн зуслангийн харшууд байдаг. Тэдгээрийн нэгийг Сосновка-4 гэж нэрлэдэг. Оросын Ерөнхий сайдын харш тул 2005 оны дөрөвдүгээр сар хүртэл огцорсон М.Касьянов уг харшид сууж байгаад харшийг улсад тушаах хугацаа нь болоход хувьдаа луйврын аргаар завшин авчээ.
А.Хинштейний ярьснаар хэдэн арван тэрбум долларын хөрөнгөтэй хүн ч энэхүү тансаг харшуудаас худалдан авах амаргүй. Учир нь энэ дүүрэгт шинэ орд харш барьдаггүй болохоор М.Касьянов хуучин харшуудыг хувьдаа завшихаар шийдсэн байна. Чингээд тэрбээр өөрийн шийдвэрээр улсын мэдлийн Сосновка-1, Сосновка-3 зэрэг харшуудыг хувийн пүүс компаниудад бараг зүгээр шахуу үнээр зарж, ингэхдээ эхнэр Иринатайгаа хамтран байгуулсан Арт-груп хувийн компаниар дамжуулан завшсан байна. Урьдын ЗХУКН-ын хоёрдугаар хүн Михаил Сусловын Сосновка-1 хэмээдэг харшийг 11 сая рублиэр М.Касьянов авсан байна. Уг харшийн хавьд ганц га газар 25 мянган долларын үнэтэй байдаг аж. Тэгвэл М.Касьяновын луйвардаж авсан уг харш 11,5 га талбайтай юм. Эдгээр харшийг завшсаны дараа М.Касьяновыг Ерөнхий сайдаас хуссан байна. Оросын хуулиар Москва болон тэр хавийн нутагт газар зарахыг хориглосон байтал М.Касьянов эрх мэдлээ хэтрүүлэн зөвшөөрч Сусловын харшийг 830 сая рублиэс доошгүй үнэтэй байсныг ердөө л 32 саяар зарж, Миша 96 хувийг хувьдаа завшсан учир одоо түүнийг Миша-96 хувь гэж нэрлэжээ.
Сосновка-1 гэхэд 11,5 га талбайтай / нэг га гэдэг нь 10,0000 дөрвөлжин ам.метр газрыг хэлдэг-Ц.Ц/ гол том харш эдлэнгээс гадна долоон том барилга байгууламж, халуун ус, орон сууцны хоёр байшин, хоёр сүүдрэвч, теннисний том талбай, усан сан, наранд биеэ ээх газар гээд өдий төдий тансаг барилгатай. Энэ нь одоогийн Ерөнхий сайдын харшаас хэд дахин том юм байна. Одоогийн Ерөнхий сайдын харшид Москва гол руу харсан усан гарц ч байхгүй. Урьд К.Черненкогийн харш байсан Сосновка-3 гэдгийг ч Касьянов одоогийн Альфа-Банк гэдгийн захирлуудын зөвлөлийн дарга тэрбумтан М.Фридманд сул үнээр өгөөд хариуд нь бөөн хээл хахууль авчээ.

Төрийн Думын депутат А.Хинштейн ярихдаа
-Путин, Касьянов хоёр улстөрийн үзэл бодлоороо нийлдэггүй байснаасаа болоод Касьянов хусагдсан мэтээр ойлголт төрүүлэхийг Миша хичээдэг. Гэвч тийм биш. Одоо Миша Ерөнхийлөгчийн дараачийн сонгуульд сөрөг хүчний удирдагч болон дэвших санаархалтай. Гүн ухаантан Чаадаевын хэлснийг яльгүй өөрчилсхийн хэлбээс Путин зөв байсандаа ялаагүй. Харин түүний дайснууд буруу байсан учраас ялсан гэж хэлж болно. / Энэ үг манай шинэ төрийн тэргүүнд ч хамаатай гэж болно/ Касьянов Ерөнхий сайдаасаа буусныхаа дараа хэвлийн бага хурал хийлгэхдээ Путин түүний улсын мэдлийн харшийг булаан авсанд гомдсон хүн шиг ярьж байсан. Улс төр судлаачид хувийн гомдолтой юм байна гэж дүгнэсэн. Тэгвэл Касьянов ажил албагүй болж сөрөг хүчний талд шилжсэн нь энэхүү зуслан харшийн хэргээс анх эхэлсэн. Тэгвэл М.Касьяновын улстөрийн талаар дахин гарч ирэх санаархал нь мөн л энэхүү харшийн хэргээр дуусч, тэр дахин өндийх байтугай ял эдлэх ёстой. Одоо Ерөнхий прокурорын газар М.Касьяновын найруулсан жүжгийн хамаг нууцыг дорхноо илрүүлнэ. Эрүүгийн хуулийн хэд хэдэн зүйл анги М.Касьяновыг хүлээж байна. Залилангийн аргаар их хөрөнгө завшсан, эрх мэдлээ хортойгоор ашигласан, хуурамч бичиг баримт үйлдсэн, хууль зөрчин хувиараа бизнес хийсэн / жишээ нь тэрбээр Ерөнхий сайд байхдаа хувийн худалдаа арилжааны пүүс байгуулах ёсгүй байсан/, Оросын гадаад өр авлагыг барагдуулахдаа дундаас нь хэр их мөнгө хувьдаа унагасан ховор загасны аж ахуйгаас мөнгө хүүлж авсан гэдэг өдий төдий ялт хэрэг үйлджээ. Гэмт хэрэгтэн этгээдийг ирээдүйд хэн ч Ерөнхийлөгчөөр сонгохгүй биз дээ гэжээ.

Миша болон монголчууд.
Эх оронд нь М.Касьяновт эрүү үүсгэн хавтас хэрэг нээчихээд байхад Монголын хэвлэлд, тухайлбал, Соёлын гавьяат сэтгүүлч, хүндэт доктор энэ тэр гээд хамаг гуншингаа зарлаж байгаад бичдэг нэг өвгөн М.Касьяновын хэрэг ид мандаж шуугиан болж байхад юу бичсэнийг сонирхуулья.
Хүнийг ханилсан нөхрөөр нь шинж гэдэг. Н.Энхбаярын дотно анд нөхрийн тоонд Оросын Засгийн газрын тэргүүн байсан М.Касъяанов /Касьянов гэдэг нэрийг зөв бичиж чадсангүй. Хатуугийн тэмдэг, нэг а илүү бичиж будилжээ./ багтана.
Их өр мэт тохиролцоход төвөгтэй хүнд асуудлыг хамгийн хялбар хөнгөн дөт замаар Монголд ашигтайгаар шийдсэн нь /гавьяат сэтгүүлч их өрийг хамгийн хялбар… ашигтайгаар шийдсэний нууцыг сайн мэддэг бололтой/ хоёр орны Ерөнхий сайд нарын хувийн дотно сайхан харилцаа /өнөөх 50 сая долларыг найзан дундаа гулгуулж алга болсгоныг хэлж байна уу/ нөлөөлснийг албаны хүмүүс ам амандаа ярьдаг. Үүнд атаархсан зарим нь М.Касьяновыг олхиогүй мэтээр ойлгуулах гэж оролдсон удаа бий /Олхиогүй байтугай Оросын Ерөнхий прокурорын газар гэмт хэрэгтэн гэж эрүү үүсгээд байгааг юу гэх вэ. Оросын хууль хяналтынхан манай гавьяат сэтгүүлчээс дор, тэнэг биш баймаар санагдах юм. М.Касьяновыг бялдуучлан магтахдаа болгооомжтой хандахгүй бол хэдэн сарын дараа М.Ходорковскийн араас дээлээ нөмөрч магадгүй шуналын микробыг Улаанбаатарын дөрвөн уулын хонхроосоо нэг өвгөн яаж ч зусардлаа ч Оросын улс түмний найрамдлын одон мэт олдохгүй л дээ/.
Гавьяат сэтгүүлч маань дарга нарыг зусардан магтах зуураа гэмт хэрэгтэн болж буй М.Касьянов давхар өмөөрч Монголын их өрийг даралцахад ганцаараа гавьяатай мэт уншигч нарт ойлгуулах зуураа Ерөнхий сайд Ц.Элбэгдоржийг ярьдаг нь компьютер, явдаг нь өрнөд, хэлдэг нь ногоон хэрэм, хэрэгжүүлдэг нь бараг нойл гэх зэргээр газар доогуур ортол нь муулжээ. Энэхүү сэтгүүлч өөрийн талын дарга нарын маажиндан гоёсон, Элбэгдоржийг маажин матарласан сонины хоёр нүүр дамжсан бялдуучлал, хараалаар дүүрэн нийтлэлээ манай өдөр тутмын хоёр сонины нэг өдрийн дугаарт нэгэн зэрэг нийтлүүлжээ. Насаараа сэтгүүлчийн ажил хийж явсан өвгөн нэг зүйлээ хоёр сонинд зэрэг нийтлүүлж болдоггүй аман хуультай, наад зах нь иймэрхүү нэг сумаар хоёр туулай буудаж хэд гурван зоосны ашиг харж болдоггүй гэдгийг надаар хэлүүлэлтгүй мэдмээрсэн.
Мишагийн олон булхай луйвар илэрч Ерөнхий прокурор шалган байцааж эхэлсэн энэ үед манай дарга нар түүнээс зай барьж хөндийрсэн нь дээр болов уу. Тэгэхгүй бол өнөөх Чехийн компаниар дамжуулан зувчуулсан 50 саяын үгүй болсны учрыг тодруулахаар Монголын хэн нэгэн зоригтой аавын хүү ОХУ-ын Ерөнхий прокурор В.Устиновт хандаж орхивол манайхан эвгүй юм дуулж мэдэхийг үгүйсгэх газаргүй мэт санагдана.

005.07.16, Монголын мэдээ