УИХ-ын сонгуулийн 65 дугаар тойргийн нөхөн сонгууль ирэх сарын 28-нд явагдахаар болоод байна. УИХ-аас нөхөн сонгуулийг явуулах товыг ийнхүү тогтоож сонгуулийн кампанит ажил энэ сарын 15-наас албан ёсоор эхлээд байгаа. Үүнтэй холбогдуулан манай сонин өмнөх дугаартаа тус тойрогт явуулах нөхөн сонгуулийн цаг хугацааны хуваарийг нийтэлсэн билээ. Харин өчигдөр Сонгуулийн ерөнхий хороо (СЕХ) хуралдаж 65 дугаар тойргийн нөхөн сонгуулийн хороог байгуулж 11 гишүүнтэй тус хорооны бүрэлдэхүүнийг баталсан байна.
СЕХ-ны тогтоолоор УИХ-ын сонгуулийн 65 дугаар тойргийн хорооны даргаар нийслэлийн Баянгол дүүргийн Засаг даргын Тамгын газрын дарга Ч.Бат-Эрдэнэ (МАХН), нарийн бичгийн даргаар хувиараа хөдөлмөр эрхлэгч А.Долгормаа (АН), хорооны гишүүдээр Баянгол дүүргийн Засаг даргын Тамгын газрын зохион байгуулагч Д.Алтантуяа (МАХН), Барилга, хот байгуулалтын яамны газрын орлогч дарга Б.Баярсайхан (ИЗ-БНН), дүүргийн Цагдаагийн хэлтсийн Эрүүгийн тасгийн дарга А.Болдбаатар (нам бус), Газрын тос, ашигт малтмалын ХЭГ-ын дэд дарга О.Даваасамбуу (МАХН), дүүргийн БНН-ын нарийн бичгийн дарга Ц.Жаргалмаа (БНН), Засгийн газрын ХЭГ-ын дэд дарга Ш.Түвдэндорж (АН), дүүргийн ИТХ-ын ажлын албаны ажилтан Р.Өнөрсайхан (нам бус), Монголын Өмгөөлөгчдийн холбооны гишүүн, өмгөөлөгч Л.Шинэн (нам бус), ТӨХ-ны дарга З.Энхболд (АН) нарыг томилоод байна. Үүнээс харахад УИХ-ын 65 дугаар тойргийн хорооны 11 гишүүний тус бүр гурав нь МАХН болон Ардчилсан Намын, ИЗ-БНН болон БНН-аас тус бүр нэг, нам бус гурван хүн байна.

Б.БОЛД
(өдрийн сонин 2005-07-19 171)