Судалгаагаар дотоодын нийт бүтээгдэхүүний 50 орчим хувьтай тэнцэх орлогыг Хятадын хүн амын таван хувийг эзэлдэг баян, чинээлэг хүмүүс олдог бол ядуу амьдралтай таван хүн тутмын нэг нь дөнгөж 4.7 хувьтай тэнцэх орлоготой болох нь тогтоогджээ. Ард түмний дунд илэрч байгаа баян, хоосны ялгаа нь цаашид өсөх хандлагатай байна гэж Синьхуа агентлагийн мэдээнд дурьджээ. Баян хоосны ялгаа ийнхүү нэмэгдсэнийг Хятадын хэвлэлүүдээр янз бүрээр тайлбарлаж, бичэж байна. Тэдний мэдээлснээр энэ нь ажлын байрны хүрэлцээ муу, хотоос хөдөө рүү хүмүүс ихээр ирж суурьшиж байгаа, ажилгүйдэл зэргээс шалтгаалж буй бололтой. Тус улсын Засгийн газар одоогоор энэ талаар ямар арга хэмжээ авахаа мэдэгдээгүй байна. Дундаж орлоготой хятад иргэдийн орлогын татварыг бууруулахгүй бол тэд ч бас ядуусын эгнээнд орж болзошгүй болоод байгаа аж. Хятадад хүмүүс хөдөөнөөс хот руу нүүдэллэн ирж суурших нь баян хоосон ялгаа гарах хамгийн том шалтгаан болж байна. Ийм ч учраас ажлын байрны хомсдол үүсч, ажилтай болохын төлөө хоорондоо тулалдахад хүрдэг гэнэ. Нэг удаа нэгэн хятад барилгачин цалингаа булаацалдсанаас болж хамт ажилладаг дөрвөн хүнийхээ амийг хороож байжээ.
Одоогийн байдлаар Хятадын дундаж орлоготой иргэний жилийн орлого хотод дунджаар мянган доллар, хөдөөд 300 доллар юм байна. Үүнийг бусад хөгжиж буй орны иргэдийн жилийн орлоготой харьцуулбал асар ялгаатай гэнэ. Удирдагч асан Мао Зедуны үед хөдөө аж ахуй эрхэлдэг байсан өндөр настнууд өнөөдөр хот суурин газар бараадан лааз, уут цуглуулан амьдарч байна. Дэлхийн эдийн засгийн нэгэн байгууллагын судалгаагаар 30 сая гаруй хятад хангалттай орлоготой боломжийн амьдралтай байгаа бол, харин түүнээс нэг дахин их буюу 60 сая хүн 100 долларын жилийн орлоготой болох нь тогтоогджээ. Эдгээр 60 сая хүний жилийн орлогыг Дэлхийн банкнаас тогтоосон хүн өдөрт нэг доллараас дээш мөнгийг хоол хүнсэндээ зарцуулна гэсэн тоотой харьцуулбал, тэд өдөрт маш бага зоосыг хүнсэндээ зарцуулж байна гэсэн үг.

(өдрийн сонин 2005-09-23 229)