Тус хороонд орших 96 дугаар дунд сургуулийн хашаанд нас барсан хүн байна гэсэн дуудлага цагдаагийнханд энэ сарын 25-ны өглөө 09.00 цагийн үед иржээ.
Дуудлагын мөрөөр цагдаагийнхан очиход нэг биш бүр гурван хүний цогцос байсан гэнэ. Тэдний нэг нь 25 орчим насны эмэгтэй, нөгөө хоёр нь 20-40 эргэм насны эрчүүд байжээ. Шүүх эмнэлгийн дүгнэлт хараахан гараагүй ч урьдчилсан байдлаар ямар нэг гадны нөлөөгүй, биедээ ил харагдах гэмтэл шархгүй нас барсан байдалтай олдсон аж. Нас бараад удсан гэх шинж тэмдэг ч бага гэнэ. Харин тэдний дэргэдээс давс мэт нунтаг цагаан зүйл олдсон нь цагдаагийнхны анхаарлыг ихээхэн татаж буй бололтой. Нунтаг цагаан зүйлийн хар тамхи, мансууруулах бодисын алин болохыг шууд тогтоох боломжгүйгээс нарийн шинжилгээнд өгчээ. Учир битүүлэг энэ хэргийг Баянгол дүүргийн Цагдаагийн хэлтэс үргэлжлүүлэн шалгаж байна.

(өдрийн сонин 2005-09-27 232)