Өнөөдөр Зайсан толгойн баруун бэлд байрлах тус цэцэрлэгт хүрээлэн болон Өндөр гэгээн Занабазарын нэрэмжит Шашин соёлын төв-ийн нээлт болж сүсэгтэн олны хөлд дарагдаж өнжлөө.
Хүрээлэнд Бурхан багшийн 18 метр өндөр сөрөг дүр сүндэрлэж байгаа бөгөөд лам хуврагууд бүтэн гурав хоног аравнайлж, ном уншиж байна. Түүнчлэн Өндөр гэгээн Занабазарын нэрэмжит Шашин соёлын төв уг цэцэглэгт хүрээлэнд байх юм байна. Тус цэцэрлэгийг Гүрдава Ринбүчи өөрийн хөрөнгөөр барьж байгаа бөгөөд БОЯ-ны сайд Барсболд ихээхэн туслалцаа үзүүлж сүсэгтэн олон, Монгол түмэндээ буянтай үйл хийжээ. Энэхүү үйл ажиллагаанд Гүрдава Рэнбүүчигийн ач гавьяаг дурдахгүй байх аргагүй. Бурхан шашинт Монгол түмэн бурханы шашиныг түгээн дэлгэрүүлэхэд үнэлж баршгүй хувь нэмэр оруулж, сэтгэл оюунаа Монгол түмний төлөө зориулсан их буянтан билээ. Тэрээр бие нь чилээрхүү байгаа боловч энэхүү ёслолд өөрийн биеэр хүрэлцэн ирж сүсэгтэн олонд хүндэтгэл үзүүлсэн юм. Нээлтэнд МУ-ын Ерөнхий сайд Ц.Элбэгдорж тэргүүтэй төр засаг, албаны хүмүүс болон сүсэгтэн олон оролцсон томоохон арга хэмжээ боллоо.
Бурхан багшийг дүрийг ийнхүү бүтээсэн нь дэлхийд тоогдох томооохон бүтээл болоод байгаа бөгөөд аялал жуулчлал хөгжиж байгаа энэ үед гадаадынхны нүдийг хужирлах, үзэж харах сайхан бүтээл болоод байгаа юм.
Энэхүү арга хэмжээний үеэр БОЯ-ны сайд У.Барсболд хэлэхдээ энэ бол цөөн хэдэн хүний ажил биш сүсэглэж сүжирч чадвал өчүүхэн зүйлийн тус нэмэр ч багадахгүй буян болж байдаг. Нэг ширхэг мод тарьсан ч багадахгүй. Тиймээс удахгүй цэцэрлэг маань сүсэгтэн олны зүтгэлээр зүлэг модоор дүүрэх байх гэж найдаж байна гэлээ.
Иинхүү сэтгэлээ ариусгаж, амар тайван, ариун дагшин газар бий болж бурхан шашины орчин сүндэрлэн босож байна.
Юутай ч монгол түмэн сүсэглэн шүтэж ирсэн Бурхан багшийнхаа гэгээн дүрийг ийнхүү мөнхөлж харж баясах, сүсэглэж мөргөх бүтээлтэй боллоо.
Ариун ёс, буян заяаг сүсэглэгч хүмүүний цуваа Бурхан багшийн цэцэрлэгт хүрээлэнгийн зүг цуврах нээ…

/Ж.Алт
Баясгалан/