Хүслийн цагаан шувууг
Амилуулж чадсан ижий уул
Хүү минь гэж тарни зохиосон эмгэн уул
Хөл дэлхий хоёрыг минь ноцолдож эхлэхэд
Бөөл бөөл хэмээн шивийн тойлсон дэм уул
Хүн бүхнийг өхөөрдөхөд
Миний энэ муухай гэж харыг нь үргээсэн хатан уул
Эрчүүлийн нүдийг унагааж явсан гоо уул
Эцгийн минь өврийг дулаацуулсан халуун уул
Өөрийг таслан олон ургасан бүл уул
Өвөр дээрээ намайг эрхлүүлсэн бурхан уул
Өвөр дээрээ намайг эрхлүүлсэн бурхан уул
Сав ертөнцийн жамаар атийж л яваа бөгтөр уул
Саваагүй үрээ өөлж хардаг бүтэн уул
Нэг л мэдэхэд намайгаа орхих хүн уул
Нэр, дүрс, үрс нь үлдэх мөнх уул
Сүүдрээс хүртэл намайгаа хармалсан сүү уул
Сүнс нь хүртэл үрээ хайрладаг аврал уул
Тооноор сарны туяа над дээр тусахад
Зүүдлэнэ гэж эмээхдээ
Толгой дээр ааваар минь үнэг зүүлгэсэн өршөөл уул
Томоо болоод холоо явахад хацрыг минь үнсэхдээ
Тосож уулзана гээд нэгийг нь үлдээсэн билэг уул
Yзэсгэлэн гоогоо үлдээж чадсан зоргоороо уул
Yрийнхээ төлөө үхэж чадах зоригтой уул
Хүслийн цагаан шувуухайг амилуулж чадсан ижий уул
Хүү минь гэж тарни зохиосон эмгэн уул
Хүүгээ өөрөө ургуулж мөнхөрдөг
Хүн уул ижий мину

М.Билэгсайхан
Танд уран бүтээлийн өндөр амжилт хүсье /Olloo.mn/