Шарилыг нь хөндөж байгаа юм биш үү гэсэн мэдээллийг өгөв. Тэнд очиход цэцэрлэгийг тойруулаад хамгаалалт гарчээ. Цэцэрлэгийн зүүн хойд хаалгаар нэвтрэх гэтэл оруулсангүй. Хөшөөний харалдаа хойд талаас нь дөхөж очоод зураг дарж байтал тэр дороо л хамгаалалтын 2-3 ажилтан хүрч ирэв. Тэдний нэг бидний амрыг эрээд хамгаалалттай газар зураг авч болохгүйг сануулж, бичиг баримтаа үзүүлэхийг хүссэн. Түүнийхээ дараа гэрэл зургийн сурвалжлагчиин авсан зургийг устгах учиртай гэж мэдэгдэв. Яахаараа авсан зургаа устгуулах ёстой юм бэ гэж маргалдаж байх зууртаа Та нар ч бичиг баримтаа үзүүлэх ёстой. Хэний ч хувцсыг өмсөөд явж байгаа юм билээ. Хэн гэж мэдэх юм өөрийг чинь гэсэн хариу шаардлагыг тавьтал Одоо манай дарга ирнэ. Тэгээд учраа ололцъё гэсэн юм.
Тэрхэн зуурт цаанаас нь нэгэн хошууч ирсэн ба мэнд ч мэдэлгүйгээр ердөө л хаанаас явааг сонирхов. Тэгээд Төрийн хамгаалалттай газар зөвшөөрлөөр зураг авдаг гэдгийг мэднэ биз дээ гэснээ Наад аппарат чинь дижитал уу гээд авсан зургаа үзүүлэхийг шаардсан. Хамт ирсэн ажилтных нь үнэмлэхийг үзэхэд Х.Ариунболд гэж байв. Тэр залуу Энэ чинь аль эртнээс яригдсан ойлгомжтой асуудал шүү дээ. Үүн дээр нэг их сенсаацч дэгдээгээд яахав гэсэн юм. Энд чухам юу болоод байгаа юм бэ. Ж.Самбуу агсны шарилыг хөндөж байгаа юм уу гэхэд хэн нь ч хариулаагүй. Зөвхөн биднийг зураг авалтаа зогсоож, тэндээс явахыг хүсэв. Юутай ч тэр цэцэрлэгийг бүхэлд нь хамгаалалтад авчээ.
Хүндэтгэл үзүүлэх ёстой Монголын төрийн нэрт зүтгэлтэн Ж.Самбуу агсны шарилыг яагаад шөнө дөлөөр, хулгайгаар шахам хөндөх болов оо?

Н.САРАН
(өдрийн сонин 2005-09-28 233, 234)