Хүүхдийн гэсэн тодотголтой Ганчимэг багш нь МХО-нд 1991 оноос найрал дууны багшаар ажиллан мянга мянган хүүхдийг урлагийн тайз руу алхааг нь чиглүүлсэн эрхэм хүн билээ. Хүүхдийн ордонтой холбогдсон энэ 14 жилийн хугацаанд түүний шавь нар нь 1000 хол давсан тоо гарч байгаа бөгөөд хандивийн тоглолтонд түүний үе үеийн шавь нар нь дуун мялаалга өргөх юм байна. Мөн хамтран уран бүтээл хийдэг МУГЖ Сарантуяа, МУГЖ Ариунаа, МУГЖ Энхзул, МУГЖ Бүрнээбаяр, МУГЖ Мөнхшүр, СТА Оюунбилэг, СТА Болормаа, СТА Жавхлан, дуучин Гантулга, Болд, Анхаа, Оюумаа, Бат-Эрдэнэ, Номинталст, Дижитал, Нюанс хамтлагууд болон УДБЭТ, УДЭТ, Түмэн эх чуулгын бүжгийн чуулга сэтгэлийн хандив өргөж ая дуугаараа мэндчилэх юм байна. Ганчимэг багшийн уран бүтээлд хүүхэд багачуудад зориулсан 150 гаруй дуу байдаг байна. Өнгөрөгч 2000 онд Монголын хөгжмийн зохиолчдийн холбоо, Монголын хүүхдийн байгууллагуудаас гранпри шагнал авч, 2003 онд Монголд анх удаа Шидэт цэцэг хүүхдийн анхны цомгийг гаргасан юм. Ганчимэг багш ажлын их ачааллаас түнхний яс нь цоорч суугаа өвчтэй болсон бөгөөд 2 удаа Хөх хотод түнхний яс нөхүүлж, найман сая төгрөгөөр өмнө нь хагалгаа хийлгэж байсан боловч сайн засал авч чадаагүй учир энэ удаад дахин хагалгаанд орох шаардлага гараад байгаа юм байна. Хэрэв энэ удаагийн хагалгаанд орвол бүрэн гүйцэт эдгэрэх боломжтой бөгөөд хоёр хөл дээрээ яван уран бүтээлээ хийх нөхцөл нь улам бүр нэмэгдэх юм байна. Энэ удаагийн эмчилгээний зардалд нийт 8.9 сая төгрөг хэрэгтэй байгаа юм байна. Ганчимэг нь дан ганц хүүхдийн дууны хөгжмийн зохиол биш бөгөөд кино, жүжгийн хөгжим бичиж байсан авьяаслаг уран бүтээлч юм. Амьдралаас урсах наран аялгуу хандивийн тоглолт энэ сарын 10-нд 19 цагаас Монгол Бөхийн өргөөнд тоглогдох бөгөөд эрүүл энхийг эрхэмлэгч хэн бүхэн энэхүү тоглолтонд хүрэлцэн ирж нэг оройг сэтгэлийн өргөл болгон өргөхийг тоглолтыг зохион байгууллах Шинэчлэл таймс сонин, Magic kiss бьюти институтийн хамт олон нийт Монгол түмэндээ манайхаар дамжуулан уламжлалж байсаныг дуулгахад таатай байна.

Т.Оргил /olloo mn/