Өнгөрсөн сард Байгалийн түүхийн музейн эртний үзмэрийн танхимаас динозаврын чулуужсан өндөг алдагдсан.
Музейгээс алдагдсан өндөг гааль дээр хураагдсан гэх хардлага гарах боллоо. Уг мэдээллийг үнэн эсэхийг холбогдох хүмүүсээс тодрууллаа.
Шинжлэх ухааны палеонтологийн хүрээлэнгийн эрхлэгч Х.Цогтбаатартай холбогдсон юм.
-Замын-Үүдийн гааль дээр динозаврын чулуужсан өндөг хураагдсан. Танай хүрээлэнд ирсэн үү?
-Манайд ирээгүй байна. Ер нь ирэх ёстой. Цагдаагийнхан ирээд асууж л байсан.
-Хураагдсан өндгийг динозаврынх гэдгийг нь тогтоох боломжтой юу?
-Манай хүрээлэнд ирвэл динозаврын чулуужсан өндөг мөн эсэхийг тогтоож болно.
Гаалийн ерөнхий газрын Эрсдэлийн удирдлага, шуурхай хяналтын хэлтсийн дарга Ш.Адьшаагаас тодруулахад,
-Өндөг манай гаалийн газарт байгаа. Удахгүй палеонтологийн төв рүү шилжүүлнэ гэлээ.

Д.ЦЭНГҮҮН
(өнөөдрийн монгол 2005-10-19 118)