Ерөнхийлөгч уулзалтын үеэр Монгол Улсын гадаад бодлогын тэргүүлэх чиглэлийн нэгд Ази, Номхон далайн бүс нутгийн орнууд түүн дотроо БНАЛАУ-тай тогтоосон уламжлалт найрсаг харилцаа, хамтын ажиллагааг гүнзгийрүүлэн хөгжүүлэх явдал чухал байр суурь эзэлдэг гээд хоёр талын худалдаа, эдийн засгийн хамтын ажиллагааг сэргээн хөгжүүлэх сонирхолтой байгаагаа хэллээ.
Мөн манай улс АСЕАН-ы бүс нутагтай харилцаагаа хөгжүүлж АСЕАН-ны орнуудын яриа хэлэлцээний түнш болох эрмэлзэлтэйг дурдаад АПЕК, АСЕМ, Зүүн Азийн хамтын нийгэмлэг зэрэг бүс нутгийн интеграцчлалын үйл явцад нэгдэхэд БНАЛАУ-ын дэмжлэгт найдаж байна гэв.
Элчин сайд Кампон Суринпуми Монгол Улсад сүүлийн жилүүдэд өрнөсөн эрчимтэй, хурдацтай хөгжлийг бид бахархан харж байдаг гээд ардчилсан нийгмийг амжилттай төлөвшүүлж чадсан танай улсаас суралцах зүйл их бий хэмээн мэдэгдэв.
Мөн он удаан жилийн уламжлалт харилцаатай хоёр ард түмний найрсаг харилцаанд түшиглэн монгол лаосын харилцаа, хамтын ажиллагааг худалдаа, эдийн засаг, боловсрол, соёл, аялал жуулчлалын салбаруудад гүнзгийрүүлэн хөгжүүлэх бүрэн боломжтой гээд хоёр талын харилцааг хөгжүүлэхийн төлөө цаашид ч идэвх зүтгэл гарган ажиллахаа илэрхийлэв.

МОНГОЛ УЛСЫН ЕРӨНХИЙЛӨГЧИЙН ХЭВЛЭЛ, МЭДЭЭЛЛИЙН АЛБАНААС МЭДЭЭЛЛЭЭ