орны хувьд ч гадаад ертөнц нээлттэй болох таатай нөхцөл болоод байгаа юм. Үүнийг дагаад сүүлийн үед дэлхийн улс орныг үзэж сонирхох, аялан авах хүмүүсийн тоо ч эрс өссөн. Харин урт хугацааны тойрон аялал хийгээд, дэлхийг бүтэн тойроод явдаг нь бараг байхгүй. Манай орны иргэдийн Гарын таван хуруу хэмээх баг дэлхийг тойрон аялах болсон тэр үеэс хойш энэ сэдэв хүн бүхний өмнө нээлттэй болсон ч эр зориг гарган урт хугацааны турш аялаж, явсан газрынхаа сонин сайхныг олны хүртээл болгоод улс орноо сурталчлаад явдаг нь байдаг билүү.
Харин энэ удаа манай авъяаслаг залуу Амай дэлхийг тойрохоор сэтгэл шулуудан бэлтгэлээ базаагаад байгаа юм байна. Харин урлагынхны улс орноор аялан тоглолт хийж явах гэсэнгүй.
Аялалын зорилго нь Монголын залуучуудад дэлхий улс орнуудын түүх, соёл урлаг, зан заншлын гээд тухайн улс орны сонин сайханг үзэж харж Монголчууддаа таниулах, өөрийн орноо ч гэсэн тодорхой хэмжээнд гадныханд таниулах, гадаадад байгаа залуучуудтай уулзаж бодит аж амьдралтай танилцах явдал юм байна. Түүнээс гадна уран бүтээлч хүний хувьд уран бүтээлийн шинэ олз, шинэ мэдрэмжийг хайх судлах, шинэ уран бүтээл хийх нь аялалын нэг зорилго байх нь лавтай.
Мэдээж хамгийн хялбар аргаар, хамгийн хямд зардлаар, хамгийн дөт замаар, хамгийн олон оронд юуг үзэж, харж, мэдэж болох вэ, дэлхийн улс орнуудаар хэрхэн явж, хаана хэрхэн буудаллаж, хооллож, ундаллаж болох гарц замыг нээж олоход бас аялалын давхар зорилго оршиж байгаа юм байна.
Аялалын гараагаа энэ долоо хоногийн баасан гаригт буюу 11 сарын 4-ний өдөр төв вокзал дээрээс Нарлаг Монгол галт тэргээр албан ёсоор эхлэх бөгөөд тэрээр ОХУ-аас эхлэн дэлхийг нар зөв тойроод ирэх бөгөөд одоогоор ОХУ, Швед, Дани, Недирланд, Франц, Герман, Итали, Испани, АНУ, Канад, Япон, Хятад гэсэн орнуудыг товлоод байгаа юм байна. Yдэлтийн party 11 сарын 3-ны үдэш Медуза диско клубт болох юм байна. Орохдоо үүдэнд Амай гэсэн нууц паролийг хэлсэн хүнийг такс-аас чөлөөлөх гэнэ.

Ингээд түүнтэй хэдхэн хором ярилцсанаа хүргэж байна.

-Мэдээж манайхан ч мэдэж байгаа Yүргэвтэй аялал хэмээх нэвтрүүлэг үнэ цэнэтэй л байгаа шүү дээ. Тэд ч бас ийм л юм яриж яваа. Гэвч тэдний аялалаас юугаараа ялгаатай юм бол?
-Тэдний хувьд томоохон ивээн тэтгэгчтэй. Тодорхой хэдэн улс орнуудаар явж сонирхолтой мэдээ мэдээлэл бэлтгэж эфирээр цацаж байгаа. Зардлаа ч нөхөөд олдог. Харин миний аялалын онцлог бол бүтэн жилийн хугацаанд хаана л очиж болох бүх л боломжит газруудаар тасралтгүй явж, аялахын зэрэгцээ явсан газар бүрийнхээ сонин сайхан бүхэн мэдээ мэдээллийг вэб сайтаар дамжуулан хүргэх юм. Энэ аялалыг би өөрөө дангаараа зохион байгуулж байгаа. Харин Голомт банк, Бодь даатгал гэсэн байгууллагууд тодорхой зүйлүүд дээр ивээн тэтгэж байгаа юм.

-Тэгэхээр бүтэн жилийн дараа эх орондоо эргэж ирэх үү?
-Энэ бол урт, хэцүү аялал болохоор нэлээн хугацаа шаардана. Тиймээс яг нэг жилийн дотор багтаж эргэж ирнэ гэж хэлж чадахгүй байна. Аялалаас ирээд аялалын сонин хачин сайхан бүхнээр уран бүтээл хийх, нэвтрүүлэг хийж хүргэх, Шинэ DҮD гаргах бодолтой байгаа.
-Ойрийн 1-2 жилийн хугацаанд Монголд байхгүй байна. Нэлээн том аялал учраас хугацааг яг тодорхой товлоогүй. Амай хаана юу хийж явааг интернэтээр харах боломжтой. Харин явж буй газруудаараа янз бүрийн үдэшлэг арга хэмжээ зохиохоор төлөвлөөд байгаа. Тиймээс тухайн улс оронд байгаа монголчууд урьдчилж майлээр харилцаад уулзалтууд зохион байгуулах боломжтой.

-Эрсдэл гаргахаас хэрхэн хамгаалж судалсан бэ?
Ганцаараа, хамгийн хямд зардлаар дэлхий тойрох бол миний хүсэл байсан. Энэ аялалдаа сүүлийн хагас жил бэлтгэл хийсэн. Мэдээж зардал мөнгө, визний асуудал гээд хүндрэлүүд байсан. Мэдээж олон орны олон янзын хэл соёл, зан заншилтай газар орнуудаар явна. Тэгэхээр мэдэхгүй улс орон, хэлний бэрхшээл гээд л их зүйл гарна. Тэр бүхнийг давахын төлөө явна. Өөрийгөө нээх хэрэгтэй байна. Миний аялалын хугацаан дахь бүх даатгалыг Бодь даатгал хариуцаж байгаа. Энэ дашрамд намайг ивээн тэтгэж дэмжиж байгаа хүмүүстээ баярлаж байгаагаа хэлмээр байна.

-Ачаа юу байх бол?
-Өөрийнхөө ачааг хөнгөвчлөх үүднээс ганцхан том цүнхтэй явна. 2 ээлжийн хувцастай явна.

-Визний асуудлыг яаж зохицуулж байна
-Монголд суугаа гадаадын элчин сайдын яамдууд нэлээн дэмжсэн. Гагцхүү Английн ЭСЯ -ны консул маш хүнд сурталтайгаар хандсан.

-Уран бүтээлийн зорилго юу байна?
-Амай дэлхийг тойроод явах нь ямар нэг уран бүтээл хийхгүй гэсэн үг биш.
Ирээд үзсэн явсан газруудаараа уран бүтээл хийх бодол байгаа. Энэ нь улс болгонд очиж тухайн улс үндэстний онцлогийг шингээсэн хөгжим зохиогоод явна.
Ийнхүү манай залуу уран бүтээлчийн маань Amai-around дэлхийг тойрон аялах аялал бэлэн болоод байна. Мэдээж энэ бол хэн бүхний санасан зоргоор яваад байх хялбар бөгөөд аялал зугаалга бус нь мэдээж. Маш хэцүү бэрхшээл, шалгалт сорилт, эргэж буцам шантрах зүйл гарах нь тодорхой. Энэ бүхнийг сэтгэлийн хат, эр зоригоор даван туулж, залуучууддаа шинэ ертөнцийг нээн таниулах их аянд мордох гэж байгаа Амайдаа амжилт хүсэх л үлдэж. Юутай ч Амайгийн сонсогч фэнүүд нь түүний барааг энэ долоо хоногоос хойш харахгүй нь харамсалтай ч гэсэн www.Amai-around.com хаягаар орж Амай хаана юу хийж юу үзэж харж байгааг мэдэхийн зэрэгзээ интернэтээр байнгын холбоотой байж болох юм байна.
Хүний газар элэг нэгт монголчууд хийгээд түүний фэнүүд нь Монгол зангаараа явсан газар бүрт нь [email protected] хаягаар майл бичиж дэмжлэг туслалцаа үзүүлж байгаасай гэж хүсэж байна.

Ж.Алт

/Оллоо.МН/