Намын дарга нь сул гишүүн байгаад байхаар санаа зовсондоо Д.Идэвхтэн М.Энхболдод хандан, Та бүлгээ авбал авна уу даа гэж. Харин М.Энхболд, Харж байж болъё доо хэмээн уужуухан хэлж Д.Идэвхтэнг тайвшруулсан байна. М.Энхболд юуг харж байж болох гээд байгаа вэ гэдгийг тааж цөхөх зүйлгүй. Намын дарга нь Ерөнхий сайд болдог уламжлал хадгалагдаад нэлээд удаж байна. Яаран бүлгийн ахлагчийг авбал аман дээрх шар тосыг хэлээрээ түлхсэн болно. Элбэгээ одоо өрөөсөн хөлтэй сандал дээр тэнцэж ядан сууж байгаа бөгөөд түүнийг унагаах нь багваахай цэцгийн хөвөн дэлбээг уруулын салхиар хийсгэхийн чинээ хялбар болжээ.
Ерөнхий сайд харин өрөвдүүлэх эцсийн шатандаа орж уран үгийг урсгаж, цаас уран жүжиглэж байна. Үгүйдээ л түүнийг огцорсны дараа, Элбэгээ л юм хийх байсан юм, яг хийгээд эхэлж байсан юм гэж яригдах ёстой.
Хогийн савтай илтгэл аргаа ядсан харагдаж байлаа. Тэр ямар ч хүнд хэцүү дүрийг бүтээж чадах авъяаслаг жүжигчин байлаа. Уул нь ийм жүжигчин гол дүрд тоглосон бол аятай юу даа. Даан ч тэр улстөрийн тайзан дээр утсан хүүхэлдэй-н үүрэг гүйцэтгэж байна. Ардчилсан намд гол дүр бүтээх боломж байсан юм. Үгүйдээ л сөрөг талын гол дүрд тоглох бүрэн боломж байлаа. Хэрэв ингэсэн бол 2008 оны сонгуулиар засгийн эрх ардчиллынхны гарт найдвартай, бас удаан хугацаагаар шилжих байлаа. Харин тэд үүнийг хүлээж тэвчихээргүй өтөлсөн бололтой.
Ах нь 16 жил намыг мөнгөөр тэтгэж хариуд нь ямар ч албан тушаал горилоогүй, ёстой л сэтгэлээрээ явлаа. Одоо больё доо, надад дараагийнхыг нь хүлээх нас ч алга. Албан тушаал авах жаахан ч гэсэн боломж байгаа дээр нь одоо л авмаар байна. Дахин надад тийм боломж гарахгүй. Дараагийн боломж нь та нарынх Ийм яриаг Ардчилсан намын олон хүний амнаас сонсож болно. Тэд үнэхээр өтөлжээ. Улстөрчийн ид гийдэг насандаа ардчиллынхан өтөлж байна. Тэдэнд ирээдүй биш өнөөдөр, яг одоо чухал.

Үргэлжлэлийг Улстөрийн сонин-ы дугаар 004-өөс уншина уу