Албаны эх сурвалжийн мэдээлж буйгаар тус хоршооны эзэд болох Б.Лхамбалхүндэв, Р.Баярмаа нар нь гэр бүлийн хоёр бөгөөд урьд нь гэмт хэрэгт холбогдож байсан хүнд гарууд аж. Хоршоодын асуудал дэгдэж эхлэх үеэр тэд хэвлэлийн бага хурал хийлгэж дампуурлаас хол гэдгээ зарлаж байсан юм. Гэвч өнгөрсөн өвлөөс үйл ажиллагаа нь доголдож эхэлсэн төдийгүй, зарим гишүүдийнхээ мөнгийг цаг тухайд нь өгч чадахгүй байна гэх хэл ам гарч байжээ. Тус хоршооны эздэд холбогдох хэргийг тусгай хэлтсийнхэн шалгаж эхэлсэн, одоогоор бодит хохирлын хэмжээ болон гишүүдийнхээ хохирлыг барагдуулж чадах эсэх нь тодорхойгүй байгаа юм.

Түүнчлэн хоршоодын хэргийг шалгах тусгай хэлтсийнхэн дампуурсан хоршоодын хаяг, сурталчилгааны самбарыг авахуулах талаар холбогдох газруудад албан бичиг явуулахаар төлөвлөсөн байна. Хаягийг нь авахгүй бол аль хэдийнэ дампуурсан хоршоодын байранд хадгаламжийн хүүг сонирхох буюу зээл олгох уу гэж асууж ирэх хүн цөөнгүй байдаг гэнэ.

Ардын эрх сонин 156 /434/

Г. Хишиг