Барилга, хот байгуулалтын яам орон сууц барихад зориулан 60 тэрбум төгрөгийн бонд гаргах байгаа тухай манай сонин мэдээлсэн. Энэ талаар тус яамны Барилга, орон сууц, нийтийн аж ахуйн бодлого зохицуулалтын газрын дарга Г.Мягмараас тодрууллаа.

-Орон сууцны бондыг хэзээнээс худалдаалах вэ?

-40 мянган айлын орон сууц хөтөлбөрийн эхний ээлжийн санхүүжилт болгон Засгийн газраас гаргаж буй 60 тэрбумын бондын нэг хэсгийг 2006, дараагийн хэсгийг нь 2007 онд худалдаална. Yүнийг Монголбанк, Санхүү эдийн засгийн яам, Барилга, хот байгуулалтын яам хамтран зохион байгуулах юм. Одоогийн байдлаар Санхүү эдийн засгийн яамнаас гаргасан бондыг Монголбанкинд өгөөд арилжааны банкуудад арилжаалахаар ярьж байна.

-Энэ бонд уг нь бага орлоготой иргэдэд зориулсан гэж байгаа. Гэхдээ иргэдэд гэхээсээ илүү санхүүгийн чадвар муутай компаниудад илүү боломж олгож буй хэрэг гэж үзэх хүмүүс байна?

-Бидний хийсэн судалгаагаар чанар сайтай барилгын нэг ам дөрвөлжин талбайд 300 ам.долларын зардал гаргаж, 470-500 ам.доллараар худалддаг. Харин бид энэ зарлагыг 260-270 мянган төгрөгт багтаан барих тендер зар­лана. Барилгын компанидаа 10 хувийн ашигтай байхаар тооцоолсон.

-Хямдхан барилга чанаргүй байх вий?

-Бондоор барйх орон сууц чамин тансаг байр байхгүй гэдгийг хэлье. Хамгийн бага стандартаар 1-2 өрөө байр барих юм. Бид өөрсдөө барилгын ажилд хяналт тавина.
Мөн УИХ-ын тогтоолоор 40 мянган айлын орон сууц хөтөлбөрийн хүрээнд барих гэж буй орон сууцны шугам сүлжээ болон сантехникийн тоног төхөөрөмжийг Нэмэгдсэн өртгийн албан татвараас чөлөөлөхөөр болсон. Ингээд бодохоор зарлага багатай баригдаж буй учраас зах зээлийн үнээс харьцангуй хямд байх болно.

-Орон сууцыг хаана барих вэ?

-Нийслэлд 1600, аймгийн төв бүрт 40, сумын төв бүрт дөрвөн орон сууц, мөн 100 оюутны байр барихаар төлөвлөсөн. 25 тэрбум төгрөгийг төрийн албан хаагчдад зориулж орон сууц барихад зарцуулна. Гэхдээ газрын асуудал ал­бан ёсоор шийдэгдээгүй байна. Энэ талаар Засгийн газрын хуралдаанд оруулан хэлэлцүүлнэ. Хэрвээ гуравдугаар улиралд багтаан аймаг, нийслэлийн Засаг дарга нар газрын асуудлыг шийдчихвэл энэ ондоо багтаан барилгын ажлаа эхлүүлчих байх аа.

-Бондоо ийм богино хугацаанд арилжаалж амжина гэдэгтээ итгэлтэй байна уу?

-Засгийн газрын бонд эрсдэлгүй учир арилжааны банкуудын хувьд ч мөнгөө өсгөх боломж гаргаж бай­гаа юм.

-Орон сууц яг хэзээ ашиглалтад орох вэ. Иргэд энэ орон сууцыг авахын тулд хаана хандах вэ?

-Энэ жилдээ багтааж барилгын ажлаа эхлүүлчихвэл ирэх жилийн тав, зургадугаар сард ашиглалтад орно. Орон сууцны үндэсний төв эдгээр орон сууцыг борлуулах ажлыг хариуцна.

Ардын эрх сонин 156 /434/

Б.Бямба