Гадаад худалдааны бичиг баримт баталгаажуулалтын газар энэ сарын 26-28-ны өдрүүдэд БНХАУ-ын Эрээн хот байгуулагдсаны 50 жилийн ойг тохиолдуулан зохион байгуулагдах импорт, экспортын барааны үзэсгэлэн яармагийн бэлтгэл ажлыг хийж байна.
GS-1 Mongolia нийгэмлэгт өнгөрсөн долоо хоногт БД, Баялаг-Үр, Стело зэрэг ХХК-ууд шинээр элсэн зураасан код авлаа.
Бизнес хөрөнгө оруулалтыг дэмжих төвийн тэргүүлэх мэргэжилтэн Л.Одончимэг энэ сарын 17-18-ны өдрүүдэд Тайландын Бангкок хотод UNDP, UNESCAP-ын хамтран зохион байгуулж буй Ази Номхон далайн худалдааг хөнгөвчлөх уулзалт-нд оролцоно. Тус товчоо энэ сарын 22-нд Цэвэр үйлдвэрлэл ба эрчим хүчний үр ашгийн төслүүдийг хэрхэн санхүүжүүлэх вэ? сэдэвт уулзалт зохион байгуулахаар бэлтгэж байна.
Үзэсгэлэн яармаг аялал жуулчлалын товчоо 9 дүгээр сарын 8-12-ны өдрүүдэд Мишээл Экспо төвд зохион байгуулагдах Улаанбаатар түншлэл 2006 Олон улсын намрын үзэсгэлэн яармаг, 11 дүгээр сарын 22-25-нд Япон улсын Токио хотноо зохиогдох IFFT 2006 олон улсын тавилгын үзэсгэлэн, БНХАУ-ын Жилин мужид 9 дүгээр сарын 2-6-ны өдрүүдэд Зүүн Хойд Азийн худалдаа, хөрөнгө оруулалтын үзэсгэлэн, чуулга уулзалт зэрэгт оролцох бизнес эрхлэгчдийг бүртгэж байна.
Зах зээл, сургалт судалгааны төв Гадаад худалдааны менежер, Мэргэжлийн нарийн бичгийн дарга, Даргын туслах бэлтгэх сургалтуудын шинэ хичээлийн жилийн элсэлт авч байна.
Өнгөрсөн хугацаанд Ко Онодера захиралтай гадаад худалдаа эрхэлдэг Плсес, С.Одончимэг захиралтай гоо сайхны үйлчилгээ эрхэлдэг Нэмэгдэхүүн, Ч.Батаа захиралтай барилгын материал импортлогч Билгүүнтрейд, Я.Эрдэнэбаяр захиралтай хүнсний ногоо үйлдвэрлэгч Гүмэн сүйх, П.Багилаш захиралтай гадаад, дотоод худалдаа эрхэлдэг Престиж фүүд трейд интернэшнл, Ө.Ганбат захиралтай геологийн хайгуул, шинжилгээ хийдэг Скарн зэрэг ХХК МҮХАҮТ-ын жинхэнэ гишүүнээр элслээ.
Патент барааны тэмдгийн товчоо 9 дүгээр сарын 7-8-ны өдрүүдэд Улаанбаатар хотноо зохиогдох Брэнд ба Мадридын систем сэдэвт Ази-Номхон далайн дэд бүсийн дугуй ширээний уулзалт ярилцлагын бэлтгэл ажлыг хийж байна.

/МYХАYТ-аас манайд мэдээллээ/