Энэ мөчийг удаан хүлээсэн баярлан угтаж байгаа хүмүүс үйлчилгээний байгууллагууд ч зөндөө байгаа бололтой.
Юуны түрүүн орон нутгийн тээврийн үйлчилгээнийхэн энэ үеэр ёстой овойж оцойтол нь оюутан чихэж Улаанбаатарлуу зөөж тэр хэмжээгээрээ ашиг орлого сайтай байдаг гэнэ. Мөн хотын автобус микронууд таксинууд гэхчилэн нийтийн тээврийнхэн хүртэл алгаа хавсран ашиг орлогын үнэр аван хүлээж байна.
Гэхдээ таксиныхны хувьд хувийн хамгаалалт сэрэмжээ сайжруулж болгоомжтой байхгүй бол *муусайн* оюутнууд хулхидаж зугтах нь их байдаг гэнэ.
За тэгээд дээр нь гуанз кафе, баарнууд, дэлгүүр түц-үүд, захын наймаачид гээд оюутан ирэхийг тэсэн ядан хүлээж байгаа газар ч олон бололтой. Ломбардууд хүртэл бид ч бас дажгүй ашигтай болдог шүү гэцгээж байна.
8 сарын сүүлчээс 9 сар дуустал тэдний орлого тун ч дажгүй байдаг аж. Учир нь бүтэн зунжин уйдаж үхтлээ гэр орондоо амарсан оюутан залуус Улаанбаатарын гудамжинд буумагцаа л эрх чөлөө ханхлуулж ээж аавынхаа хуруу хумсаа зулгаан байж цуглуулж өгсөн хэдэн цаасаар ёстой л нэг тансаглаж өгдөг гэх.

Бөөн бөөнөөрөө найз нөхдөөрөө уулзаж биесээ санасан гэж жигтэйхэн нийлж наргиж дарвиж нэг хэсэгтээ л бийлэгжүү загнана.
Дэлгүүр захаар давхиж намар өвлийн хувцасаа базаана хоол ундаа цуглуулна. Дараа нь баар цэнгээний газраар бол хэд хоногтоо эргэлдэж өгнө дөө. Будаг нь ханхалсан шинэ хувцас өмссөн охид хөвгүүд *би даая би даая* гэх халаг л мөнгөө үрцгээж шоудаж гүйлдэнэ.

9 сарын 1-ний өдөр бол бүр ч будаа. Баар савнууд бүр суудалгүй болж, хүнгүй такси олдохоо больдог гэх. Эрүүлжүүлэх хүртэл дүүрдэг гэж бодохоор тун ч нижгэр баяр найр наадам байдаг бололтой. Энэ жил аягүй бол *Их Монгол 800* тохиож байгаа гээд бүр ч нижгэр авах биз. Ямар шалтаг мундах биш хэхэ.
Угтаа бол 9 сарын 1 эрдэмийн баяр байлтай. Гэтэл манайд 9 сарын 1 оюутан залуусын уулзалдсанаа тэмдэглэж амаар гартлаа архиддаг баяр болсон гэхэд хилсдүүлэг болохгүй. Яг л хонхны баяр шигээ.
Гэхдээ энэхүү тансаглал нь үсрээд л сар орчим үргэлжилдэг гэж болно. Нэг их удахгүй хэдэн цаас нь дуусаж нөгөө сайхан залуус маань хоёр хуушуур яаж олж идье дээ гэж бодсон шигээ, автобус тролейбусын ард кондуктортай хэрэлдэн гүрийж явах нь бий. Энэ бол ирээдүйн улс төр, нийгэм, эдийн засаг, урлаг, спортын эзэд одуудын маань үнэн дүрх төрх.
Шинэхэн оюутан бол анх 9 сарын 1-нд оюутан болсон гэж дээд дамжааны ах эгч нартайгаа нийлж *холгуулж*, ангийхантайгаа танилцаж *аархаж* архидаад л дөрвөн жилийн дараа хонхны баяраараа нэлээд архаг болчихсон тасарч унатлаа архидаж баярлаад л төгсдөг нэг иймэрхүү жамтай гэх.
Дэлгүүрийн худалдагч нар 9 сар болж оюутнууд ирэхээр л мянгын архины маань гүйлгээ мөн ч сайжирдаг шүү гэж баярлалдан ярилцаж суух жишээтэй.
Тэрхүү мянгын архины үйлдвэрийн эзний бол бүр магнай нь тэнийж хятад спиртээ бүр ихээр татаж нөөцөлдөг биз.
Баарнууд ч ялагаагүй нар нь гардаг гэх. Аргагүй дээ жинхэнэ шоучид нь оюутнууд байдаг юм чинь. Бас болоогүй арван жилийн ахлах ангийхан ч тэднээс дутахгүй гэх юм билээ.
Иймэрхүү л хандлагатай 9 сар дөхөж оюутнуудын түрүүч Улаанбаатарлуу цуварч эхэллээ.
9 сарын 1-н эрдэмийн баяр болоосой доо.

/Болод.Мөнхдөл/