Манай баг дараа жил дэлхийн аварга болно

-Хүрэл медаль бол амжилт. Гэхдээ өөрийн талбайд тоглосон багийн хувьд бол чамлахаар амжилт байх?

-Манай баг хүрэл медаль хүртэж хөгжөөн дэмжигчдээ баярлуулсан.

-Та асуултад хариулсангүй?

-Мэдээж хөгжөөн дэмжигчид биднээс алтан медаль хүлээж байсан нь тодорхой. Биднийг аз ивээсэнгүй. Нэмэлт цагт эхний шайбаар хожигдох маш хэцүү.

-Финландын баг их сайн хамгаалж тоглосон. Та буруу тактик сонгочихсон юм шиг санагдсан шүү?

-Уучлаарай, ямар тактик сонгохоо дасгалжуулагч л шийддэг. Зөв ч бай, буруу ч бай хариуцлагаа дасгалжуулагч үүрдэг.

-Хожигдлын шалтгааныг өөрөөр юу гэж тайлбарлах вэ. Мэдээж та гол тоглогчдын гэмтэлтэй холбон тайлбарлах байх?

-Морозовын гэмтэл тодорхой хэмжээгээр нөлөөлсөн тал бий. Тэгээд ч тоглолтын эхэнд Счастливый, Марков нар гэмтсэн нь сөргөөр нөлөөлсөн.

-Морозовын оронд яагаад Брылиныг тоглуулсан юм бэ?

-Казанийн тавтыг задлах үнэхээр хэцүү байсан. Тэд олон жил хамт тоглосон учир өөр тоглогчийг хүлээж авахгүй байв. Брылины хувьд ийм л явдал болсон.

-Та Овечкиныг ашиглаж чадаагүй гэдэгтээ санал нийлэх үү?

-Овечкин бол шилдэг довтлогч. Магадгүй, би буруу сонголт хийсэн байж болох юм.

-Түүнийг Ковальчук, Малкин нартай тоглуулсан бол арай илүү үр дүнд хүрэх байсан болов уу?

-Магадгүй, гэхдээ болоод өнгөрсөн явдалд элдэв дүгнэлт хийх утгагүй байдаг.

-Яг үнэндээ мэргэжлийн хоккейн лигийн тавт л гол үүрэг гүйцэтгэлээ шүү дээ. Уг нь дахиад нэг ийм тавттай байх боломж танд байсан. Харин та боломжийг түлхсэн?

-Би ойлгохгүй байна.

-Та Семиныг ялихгүй шалтгаанаар багтаа аваагүй, Зубов, Яшин, Федоров нарт ихэмсэг хандсаныг бүгд л мэдэж байгаа шүү дээ?

-Семин авьяаслаг залуу тоглогч. Түүнд боломж бий. Ярьж тохирчихоод цугларалтад хоцорч ирнэ гэдэг байж болшгүй явдал.

-Тэгвэл Зубовыг яагаад уриагүй юм бэ. Тэр мэргэжлийн лигийн хамгийн шилдэг хамгаалагч шүү дээ?

-Зубовыг хэр сайн хамгаалагч гэдгийг мэдэлгүй яахав. Түүнтэй хамт тоглож явлаа. Yнэндээ Зубов, Федоров нар багийн тоглолтод таарахгүй байсан юм.

-Мэргэжлийн хоккейчдын дэмжлэггүйгээр дэлхийн аварга болох найдвар алга гэж бүгд ярьж байна. Бодит байдал ч ийм байгаа?

-Би санал нийлэхгүй. Манайх тэдэнгүйгээр дараа жил дэлхийн аварга болно.