КУДС-ийн оюутнууд хонхны баяраа архигүй тэмдэглэнэ
КУДС-ийг энэ жил жүжигчин, найруулагч, зураач, сэтгүүлч, оператор, дуу хөгжмийн найруулагч, хувцасны дизайнерын бакалавр, урлаг судлал, урлагийн байгууллагын удирдлагын чиглэлээр магистр зэрэгтэйгээр 83 оюутан төгсч мөнгөн хонхны баяраа хийх гэж байгаа юм.
Улсын хэмжээнд их, дээд сургуулийг жилдээ 24 мянган оюутан төгсдөг. Хонхны баярын зардалд дунджаар нэг оюутнаас 400 000₮ гардаг. Хонхны баярт зарцуулдаг нийт мөнгөний 30 хувь нь архи дарсанд зориулагддаг байна. ЦЕГ-ийн мэдээллээр өнгөрсөн онд зөвхөн хонхны баярын үеэр 961 оюутан эрүүлжүүлэгдэж, 48 гэмт хэрэг гарч, 9 оюутан хүчин, аллага, амиа хорлох болон бие биенээ хүндээр гэмтээсэн эрүүгийн гэмт хэрэгт холбогдсон байна. Ийнхүү хонхны баяраар замбараагүй архиддаг зуршил тогтсоноос олон оюутны хувьд амьдралын гараа нь хазгай тавигдаж, баяр биш гунигийн өдөр болон хувирах нь цөөнгүй тохиолдож буй тул Жигжидийн нэрэмжит КУДС нийт төгсөгчдөд хандаж Архигүй хонхны баяр уриалга гарган хөдөлгөөн өрнүүлж байна. Тус сургуулийн уриалгыг БЗД-ийн ЗДТГ, Иргэдийн Альяанс төв, Моторт ертөнц чопперс клуб, Нийслэлийн цагдаагийн газар , Рейтинг PR ХХК зэрэг байгууллага, С.Сэрчмаа, Киви, Гайз, Болдбаатар, BX, Татар, Драмын Театрийн дөрвөл зэрэг хамтлаг, дуучид, бүх телевизүүд, Өдрийн сонин, Өнөөдөр Өглөөний сонин, 101,7, 98,1, 102,5, 107,5 зэрэг хэвлэл мэдээллийн байгууллага дэмжин хөдөлгөөнд оролцохоо мэдэгдээд байна.
Тус сургуулийн төгсөгчид тайз дэлгэцийн урлаг, телевизүүдэд амжилттай ажиллаж байгаагаас заримыг дурдвал Ингэн нулимс киногоороо Оскарын шагналд нэр дэвшсэн Д.Бямбасүрэнгээс эхлээд МҮОНТ-ийн гэрэлтэй цонх хөтөлбөрийн ерөнхий редактор хөтлөгч, Агаанноров, захиалгат инээд хамтлагийн жүжигчин Адьяа, Мөнх-Эрдэнэ, Батбаяр, УДЭТ-ын жүжигчин Бадарч, Гэрэлт-Од, Хана, Цусны үнэр кинонд тоглосон Идэрбат, зохиолын хит дуунуудын клипүүдийг хийдэг Логик фильмийн бүх уран бүтээл чамлалтгүй урт жагсаалт гарна. 1998 онд байгуулагдсан энэ сургуулийн төгсөгчид ажил хайхын зовлон бараг мэддэггүй, тэдний 80-90% нь ажилтай болдог. Сайн багш нарын гараас чадварлаг шавь нар төрдөг нь мэдээж. Ардын жижигчин П.Цэрэндагва, Д.Mэндбаяр, УГЗ найруулагч Б.Мөнхдорж, УГЗ зураач О.Мягмар, МУГЖ С.Сарантуяа, СТА дэд профессор Ш.Цэцэг нарын тайз дэлгэцийн одод КУДС-т багшилдаг байна.
/Оллоо.МН/
