Эргэлзээт сэтгэлийн чулуун гудамжнаа

Цэл залуухан тэр охин

Эргэлзээт сэтгэлийн гудамжнаа

Цэцэг тэврэн алхах нь

Эртний сонгодог төрхтэй

Гэрлийн чимэглэлээ гайхуулах

Эндхийн чамин зээлүүд

Сэрлийн үнэр ханхлуулсан

Эрээ цээргүй наймаатай

Буруу, зөв сэтгэл, булингартай итгэл,

Бусармаг ухаан, бусчир оюун санаа,

Уран гоё үг, наалинхай ааш,

Учирлах гуйлт, увайгүй түрэмгий тэврэлт,

Дур булаам, эсвэл ой гутам харц,

Дугариг бор царай, нүмарсан хөмсөг,

Хоосон халаас, нэг бол дүүрэн хэтэвч,

Хорсол, занал, шаналал, хагацал

Эргэлзээт сэтгэлийн гудамжинд үгүй юмгүй ч

Энд нарны гэрэл, өглөөний туяа үгүй

Эртний сонгодог зураг шиг хацар гоо охины

Эрж хайж яваа үнэнч хайр дурлал бүр ч байхгүй

Эргэлзээт сэтгэлийн чулуун гудамжнаа

2007.I сар.

Даваадоржийн ЭНХБОЛДБААТАР