Мэдээлэлжсэн нийгмийн дэлхийн өдөр үүдээ нээсэн ICT EXPO 2007 үзэсгэлэнд оролцогчид болон хэрэглэгчдийн санал асуулгаар тодруулсан шилдгийн шилдгүүдэд уг үзэсгэлэнгийн хаалтын ажиллагааны үеэр өргөмжлөл, шагналыг нь гардууллаа.

Шагнал гардуулах ёслолын үеэр хэлсэн үгэндээ Мэдээлэл, харилцаа холбоо, технологийн газрын дарга Ч.Сайханбилэг Манай салбарын дэвшил, хөгжил жил жилээр биш өдөр цагаар илэрхийлэгдэж буй энэ үнэмлэхүй хурдтай цаг үед шинэчлэл, шилдгийг шалгаруулах үйл явц улам өрсөлдөөнтэй, ширүүн болох болжээ гэлээ.

Уг үзэсгэлэнгээр утасгүй интернэтийн Улуснет ХХК-ийн WiMAX технологи Мэдээлэл, харилцаа холбоо, технологийн салбарын шилдэг шинэ технологиор шалгарлаа. Салбарын шилдгээр шалгарсан бүтээгдэхүүн, үйлчилгээг сонирхвол

1 Шинэ технологи /WiMAX/ Улуснет ХХК

2 Шинэ үйлчилгээ / бүтээгдэхүүн /Happy life/ Юнител ХХК

3 Шинэ санаачилга /Вебийн үйлдвэр/ ЕМОНГОЛ ХХК

4 Шилдэг хөрөнгө оруулагч MCS групп

5 Шилдэг шийдэл /NGN+CDMA2000 1x/ МЦХ ХК

6 Шилдэг үйлчилгээ /NICE үйлчилгээ/ Скайтел ХХК

7 Хэрэглэгчийн таашаалд нийцсэн үйлчилгээ 1950 1950

8 Хэрэглэгчийн итгэлт түнш ZTE

9 Хэрэглэгчийн төлөө /Компьютерийн худалдаа/ SAIN computers

10 Шилдэг оролцогч /Юнител ХХК/

11 Санаачилгатай оролцогч /PRIMA дэлгэц/ Протек ХХК

12 Өвөрмөц оролцогч Мобиком корпораци

Мэдээлэл, харилцаа холбооны технологийн хамгийн сүүлийн үеийн шийдлүүд, салбарын өнөөгийн хөгжлийн түвшинг үзүүлэх зорилготой ICT EXPO 2007 үзэсгэлэн таван хоног үргэлжилээд өндөрлөсөн юм. Мишээл экспо төвд гарсан уг үзэсгэлэнгийн хаалтын ажиллагаанд оролцогч байгууллагууд халуун бүлээрээ цугларч, таван хоногийн нүсэр ажлынхаа үр дүнг хэлэлцэв.

Үзэсгэлэнгийн үеэр зохион байгуулсан хэрэглэгчид, байгууллагуудад хандсан танин мэдэхүйн болон сургалт, туршлага солилцох төрөл бүрийн уулзалт зөвлөгөөнүүд төлөвлөсөн үр дүнд хүрч чадсаныг үзэсгэлэнд оролцсон байгууллагуудын төлөөлөгчид онцолж байв. Өнгөрсөн жилээс эхлэн уламжлал болгон зохион байгуулж байгаа энэ үзэсгэлэнд өнөө жил түрүүчийнхээс хавьгүй олон байгууллага оролцсон нь уг арга хэмжээг улам сонирхолтой өрнүүн болгож байсныг хүмүүс дор бүрнээ дүгнэсэн юм.

/Оллоо.МН/