Оросууд хятад ногооноос татгалзаж байна

Гааль ногооны импортын татварыг 15 хувь нэмлээ л гэнэ. Гэсэн ч байдал хэвээрээ.

Харин Оросууд хятад ногоо, жимсний импортыг шахаж чаджээ. Эрхүүд гэхэд л хятад ногоо оруулахгүй харин жимс, ногооны бизнес эрхлэх сонирхолтой хятадуудад газар өгөөд ногоо тарих боломж нөхцөл буй болгосон байна. Өөрөөр хэлбэл, эрхүүчууд Сибирийн сайн чанарын хөрсөнд ургасан ногоо, жимс иднэ гэсэн үг.

Хятад худалдаачдын ногоо хямд гэхдээ заваан

Хяналт, шинжилгээнийхэн ч зүгээр суудаггүй. Ард түмнээ хортой, муу чанартай ногоо идчих вий гэж санаа зовж, их ажил хийдэг байна. Эрхүүд лабораторынхон хятадуудын зардаг ногоог шинжилгээнд оруулсан байна. Хятадуудын ногоо зардаг павильонд ороход тэдэнд хүнд үзүүлэх ямар нэг баримт бичиг байдаггүй. Заваан гэдэг нь жигтэйхэн. Өргөст хэмх шалаар хөглөрнө. Жин нь зөрөөтэй, худлаа заана. Гэхдээ энд лооль, өргөст хэмх Оросын өөрсдийнх нь иргэдийн зардаг жимс, ногооноос 20-30 рублиэр хямд байдаг байна. Тийм учраас хотын захын дэлгүүр, лангууны эзэд эндээс жимс, ногоог шуудай, шуудайгаар нь зөөдөг байна. Ингээд л авчирсан ногоогоо угаалганд оруулаад цэвэрлээд л Узбекээс авчирсан гээд тавьж орхино. Нэг кило лооль 80 рубль, энэ нь хятад ногооноос хоёр дахин үнэтэй гэсэн үг. Үнэ нь өндөр болохоор хятад ногоо гэж хэн ч боддоггүй. Эрхүү хотын Свердловскийн зах дээрх ногооны павильонуудыг шалгахад зарж буй ногоо, жимсний нэгд нь ч дагалдах бичиг баримт байсангүй. Хаана ургуулсан, яаж ургуулсныг нь хэн ч мэдэхгүй.

Ногоорсон төмснөөс хордож ч болно

Хяналтын албаны ажилтнууд нэг гялгар уут төмс авч, шинжилгээнд өгчээ. Ингэхэд дөрвөн төмсний гуравт ногоон туяа суусан байв. Үүнийг хүмүүс нэг их тоодоггүй. Тэгвэл мэргэжилтнүүд ийм ногоон туяа суусан төмс хоол хүнсэнд хэрэглэхийг хориглодог байна. Харин ийм төмсийг үрийн зориулалтаар ашиглаж болох гэнэ. Ногоорсон, бага зэрэг ногоон туяа суусан нь хорт бодис соланин хуримтлагдсан шинж гэнэ. Тэгэхээр дөрвөн төмсний гурав нь ногоон туяатай гэхээр ийм төмсийг их хэмжээгээр идвэл хордож болох юм. Харин дээрх төмсөнд радио идэвхт бодис тун бага байв. Гэхдээ энэ нь тайвшрах үндэс болохгүй гэнэ. Дулааны улиралд төмсөнд нитрат хуримтлагдаж эхэлдэг байна. Хавар болохоор төмс ховордож, шинэ ургацын төмс гартал үнэ улам өсдөг. Тийм учраас мэргэжилтнүүд шинэ ургацын төмс гартал хуучин оны төмс худалдаж авахгүй байхыг уриалжээ. Авсан ч сайн үзэж авах хэрэгтэй. Ногоон туяа суусан, бяцарсан, соёолж ургасан бол битгий худалдаж аваарай гэж зөвлөж байна. Хаврын төмс амархан соёолж ургах гээд байдаг. Соёолж ургасан төмс хүний биед бас л хортой гэж мэргэжилтнүүд хэлж байна.

Алим, өргөст хэмх шалгалтад бүдэрсэнгүй

Харин хятад өргөст хэмх, алиманд радио идэвхт бодисын хэмжилт хийхэд аюултай хэмжээнд хүрсэн зүйл ажиглагдаагүй байна. Нитрат ч ердийн хэмжээтэй байжээ. Индикатороор хэмжилт хийхэд нитрат байх ёстой нормоос алимд 20 хувь, хэмхэнд 40 хувь илэрчээ. Харин том, зөөлөрсөн лоолинд дээрх хортой бодис 60 хувь илэрсэн байна. Гэхдээ хятад хэмх , лоолийг идэж болох юм байна гэж бас бодож болохгүй. Жишээ нь хяналтын байгууллагын дагалдах бичиггүй бол сэжигтэй л гэсэн үг. Ийм ногоог юугаар бордсон, ямар нөхцөлд хадгалсныг хэн ч мэдэх боломж байхгүй. Харин тосгонд, хөдөө орон нутагт, оросууд өөрсдөө бор хөрсөнд ямар нэг химийн бодис хэрэглэхгүйгээр төмс, жимсээ ургуулдаг. Тийм учраас оросууд гадны тэр тусмаа хятад ногооноос татгалзахыг ард олондоо уриалж байгаа аж.

2007.05.29 Монголын мэдээ

0 Сэтгэгдэл
Inline Feedbacks
View all comments
Back to top button