Худалдан авагчтай харилцах соёл

Харилцааны соёл нь үйлчилгээний танхимд тайван, ажил хэрэгч нөхцөл байдлыг бий болгохоос эхэлнэ. Хэрвээ үйлчилгээний ажилтанд хүндэтгэл, үнэнч байдал, ёс журамтай байдлын наад захын шинж чанар байхгүй тохиолдолд харилцааны соёлын талаар ярих ч боломжгүй болно. Үйлчилгээний ажилтны мэргэжлийн ёс зүй нь тэдний биеэ авч явах ёс суртахууны шаардлагуудыг өөртөө агуулдаг. Мэдээж хэрэг ёс суртахууны шаардлагуудыг ард түмний соёлын түвшин дээгүүр нийгэмд бүрэн хангагдана.
Одоо цагт үйлчилгээний ажилтны ёс суртахуун, харилцааны соёлыг тэдний мэргэжлийн чанарын чухал үзүүлэлт хэлбэрээр авч үзэж байна. Үйлчилгээний ажилтнууд худалдан авагчтай харилцах харилцааны явцад маргаантай нөхцөл байдал үүссэн ч соёлтой, боловсон үйлчлэх сэтгэл зүйн бэлтгэлтэй байх ёстой.
Харилцааны соёлд үйлчилгээ¬ний ажилтан, үйлчлүүлэгч хоёрын хоорондох зайн алслалт чухал нөлөө үзүүлнэ. Үйлчилгээний ажилтан үйлчлүүлэгчээс 70-80 см зайд зогсох нь зүйтэй.
Харилцагч 2 тал нүүр нүүрээрээ харж, нүдээрээ холбоо тогтоон харилцах нь харилцааг тодорхой хэмжээгээр хөнгөвчилдөг.
Харилцааны соёл нь үйлчилгээний ажилтны худалдан авагчтай харилцах үед үггүй харилцааны хэрэгслэлүүдийг /нүүрний хөдөлгөөн, дохио зангаа/ ашиглах чадвараас шалтгаална. Ажилтнууд нүүрний хөдөлгөөн буюу мимик, дохио зангааг ярианы явцад хэрэглэгчийн анхаарлыг өөртөө татах, сэтгэл хөдлөлийг нь нэмэгдүүлэхэд ашиглаж болно.
Үйлчилгээний туршлагатай ажилтнууд худалдан авагчтай харилцах харилцаагаа урьдчилан төлөвлөх чадвартай байдаг бөгөөд худалдан авагчтай үгтэй болон үггүй харилцааны хэрэгслэлүүдийн тусламжтайгаар холбоо тогтоож харилцдаг.
Харилцааны соёл нь үйлчилгээний ажилтны тавьж буй саналд худалдан авагч хэр зэрэг анхаарал хандуулж байгаагаас шалтгаална. Худалдан авагчдын хувьд харилцааны эхний хэдхэн хоромд үйлчилгээний ажилтны талаархи сэтгэгдэл бий болно. Иймээс худалдан авагчтай холбоо тогтоох үед үйлчилгээний ажилтны эхний хэлсэн хэдхэн өгүүлбэр хэрэглэгчийн анхаарлыг татаж, түүнд өөрийн хэрэгцээ шаардлагаа илэрхийлэх хүслийг бий болгох ёстой.
Харилцааны соёлын хүрээнд жижиг зүйл гэж байдаггүй, бүх зүйл тухайлбал, нүүрний хөдөлгөөн, дохио зангаа, дуу хоолойны өнгө, ярианы давтамж, хувцаслалт чухал гэдгийг үйлчилгээний ажилтан бүр санаж байх хэрэггэй.
Үйлчилгээний ажилтны мэргэжлийн ур чадварын чухал үзүүлэлтийн нэг нь хэрэглэгчийг анхааралтай сонсох чадвар юм. Ажилтны хувьд аль болох бага ярьж, хэрэглэгчийг илүү сонсох нь зүйтэй. Сонсох чадвар эзэмшихийн ач холбогдол нь
* Үйлчилгээний сайн ажилтан болох боломж бүрдэнэ
* Хоёр чих, нэг ам дүрмийг баримтлах боломжтой ярихаас 2 дахин их сонсох хэрэгтэй /
* Үйлчлүүлэгчийнхээ жинхэнэ эрэлт хэрэгцээг мэдэх боломжтой
* Сонсох зуураа үйлчлүүлэгчээ таних боломжтой
* Үйлчлүүлэгчдийг өөртөө татах боломжтой
Yйлчилгээний ажилтны ярианы соёл
Ярианы соёл нь харилцааны соёлын чухал бүрэлдэхүүн хэсэг мөн. Ярианы соёл гэдэг нь орчин цагийн хэлний шаардлагад нийцүүлэн зөв ярих, ярианы хэм хэмжээг хэлнэ.
Ярианы соёл гэдэг ойлголтонд ярилцлагын зорилго, агуулга болон харилцааны нөхцлөөс шалтгаалан хэлний хэрэгслэлийг бүтээлчээр ашиглах чадвар орно. Иймээс үйлчилгээний ажилтан өөрийн үгсийн сангаа баяжуулж, боловсон, сэтгэл хөдлөлтэйгээр ярьж сурах хэрэгтэй.
Үйлчилгээний ажилтны ярианд тавигдах үндсэн шаардлагууд гэвэл
Утга төгөлдөр байх
Ажилтны яриа нь санал болгож буй үйлчилгээг өөрөө төгс мэддэг гэдгийг батлах ёстой. Өөртөө бүрэн итгэлтэй ярьж чадахгүй тохиолдолд худалдан авагчид үйлчилгээний онцлог, давуу талыг итгүүлж үнэмшүүлэх боломжгүй болно. Аливаа нэг барааг сурталчлах явцдаа гол зүйлийг тодотгох хэрэгтэй бөгөөд үүнийг үгсийн баялаг сан болон хэрэгтэй үгээ зөв сонгох чадвар эзэмшсэнээр хийнэ.
Тодорхой, ойлгомжтой байх
Хэн тодорхой сэтгэнэ, тэр хүн бодол санаагаа тодорхой илэрхийлж чадна хэмээх Орос ардын зүйр үг сайн тунгаан бодсон санааг боловсон ярианд шилжүүлэхэд хялбар байдаг гэдгийг баталж байна. Үр ашигтайгаар, тодорхой мэдээлэл өгөхийн тулд санал болгож буй үйлчилгээний талаар өөрөө сайн мэддэг байх нь зүйтэй.
Үйлчилгээний ажилтан ярианы явцад дараах зүйл дээр анхаарах хэрэгтэй. Үүнд
* Сул үг олон хэрэглэх
* Хэлсэн үгээ дахин давтах
* Хэт марзганах
* Зориудаар гоёмсог үг хэрэглэх зэргээс аль болох зайлсхийх хэрэгтэй.
Түүнчлэн гайхамшигтай үлгэрийн юм шиг, дээд зэрэглэлийн гэх мэт нэг хэвийн тодорхойлолт, үг хэллэгүүдийг хэт их хэрэглэхээс зайлсхийх хэрэгтэй. Ямар ч мэдээллийн шинж чанаргүй, зөвхөн дуугүй байдлаас гарах зорилгоор тэгэхлээр, ингэхлээр, өөрсдөө ойлгож байгаа биз дээ гэх мэтийн үг хэллэгийг хэрэглэхээс татгалзаж, өөрийн ярианд тавих хяналтаа нэмэгдүүлэх нь зүйтэй.
Үйлчилгээний ажилтан зөв сайхан дуудлагаар ярих чадварыг бүрэн эзэмшсэн байх ёстой. Үйлчилгээний ажилтны үгийн дуудлага муугаас болж тухайн ажилтны хэлсэн санааг хүлээн авахад хүндрэл учруулдаг бол зөв, сайхан дуудлагатайгаар ярих нь ярилцлагыг үр дунтэй болгоно.
Алдаагүй зөв ярих
Үйлчилгээний ажилтан үгийн зөв бичих болон дуудлагын дүрмийг сайн мэдэх ёстой. Бараа үйлчилгээг нэрлэхдээ үнийн жагсаалтанд бичсэний дагуу хэлнэ.
Үгээ тод хэлэх
Үйлчилгээний ажилтан нүүрний хөдөлгөөн, дуу хоолойны өнгөө ярианы агуулгатай зохицуулж чаддаг байх ёстой. Ярианы хурдаа тохируулж, хэт яарахгүйгээр ажил хэрэгч яриаг өрнүүлэх нь зүйтэй. Өгүүлбэрээ бүрэн дуусгаж, үгээ тод хэлж, хурдаа тохируулж яриагүйгээс болж худалдан авагч хэлсэн зүйлийг бүрэн хүлээн авч чадахгүй төдийгүй дахин давтан хэлэхийг хүсдэг. Энэ нь үргүй цагийн гарздал гаргах эх сурвалж болно.
Дуу хоолой бол хүний хувийн онцлогийн илэрхийлэл мөн. Үйлчилгээний ажилтан харьцангуй чанга, тод, ойлгомжтой ярих шаардлагатай.
Бизнесийн цаг (15/509)