Асар цирк-ийнхэн ирэх жил дахин тоглох нь
Тэд Хятадаас Хөрш-3 тоглолтод ирсэн циркчин амьтад билээ. Өнгөрсөн зургадугаар сарын 1-нээс нийслэлийн хүүхэд багачуудыг баярлуулсан Асар цирк хөдөө орон нутгаар айлчилж яваа. Хөрш хоёр орны циркчид өнөөдөр нийслэлд ирээд маргааш нутгийн зүг жолоо зална гэнэ.
Асар цирк-т Хятадын циркчин амьтдаас гадна хөлдөө асар хүчтэй циркин бүсгүй, амьтан сургагчид, Оросын гэр бүлийн хоёр алиалагч, манай уран нугараач хүүхдүүд, дээсээр наадагчид бий. Тэднийг удирдан яваа Шинэ цирк-ийн захирал Д.Зоригттогтохтой утсаар холбогдлоо.
-Сайн байна уу, Зоригоо ах аа. Зууны мэдээ сониноос ярьж байна. Та хэд одоо хаана байгаа вэ?
-Сайн, сайн байна уу. Бид Дорнодод тоглож байна.
-Хэзээ, хаашаа нүүх гэж байна?
-Өнөө орой (өчигдөр орой) хот руу гарахаар болсон.
-Ашгүй дээ. Нийслэлийнхэнд Асар цирк-ийн амьтдыг дахин үзэх хүсэл их байгаа юм шиг. Энд тоглох нь ээ?
-Үгүй ээ, хотод тоглохгүй. Хөрш хоёр орны маань циркийн амьтад 31 -нд нутаг буцахаар болсон. Яагаад гэвэл, Хятадын тал циркийн амьтдаа наймдугаар сарын 1-нд оруулж ирэхийг хүссэн юм. Уг нь 25 хүртэл тоглочихсон бол олон аймгийн хүүхэд, багачууд заан, бар, баавгай, тогосыг үзэх байлаа.
-Халуу шатсан ойрын хэдэн өдрийг хэрхэн өнгөрөөв?
-Халуунд дажгүй байлаа. Эд чинь угаасаа халуун орны амьтад болохоор нэг их тоосонгүй. Анх удаа урт хугацааны аялан тоглолт хийж байгаа болохоор зарим нь замдаа ядарч л байна.
-Нээрэээ амьтад юу идэж байна. Өдөрт ямар хэмжээний зүйлээр хооллодог вэ?
-Бар өдөрт 5-8 кг мах, заан дөрвөн боодол өвс, хагас шуудай лууван, дөрвөн ширхэг байцаа иддэг.
-Хоёр бамбарууш, тогосыг орхичихлоо. Тэд хоол иддэггүй юм уу?
-Хоёр бамбарууш маань өндөг, печень, жигнэсэн будаа, талх, лууван гээд өдөртөө 5-6 кг хоол идчихнэ шүү. Харин тогос будаа, байцаагаар хооллодог.
-Хоол, хүнсийг нь яаж бэлтгэх вэ?
-Очсон газраасаа худалдан авч байсан.
-Аль аймгуудад тоглов?
-Хотоос гараад Дархан, Хөтөл, Эрдэнэт, Сэлэнгэ, Зүүнхараа, Өндөрхаан, Дорнодод тоглочихлоо. Тэнд олон үзэгчтэй байсан. Аймаг бүрийн төв талбайд циркийн асраа барьж төвхнөөд л тоглолт үргэлжилж байлаа.
-Эрдэнэтэд очоод амьтдыг усанд оруулсан гэсэн. Түүнээс хойш ариун цэвэр сахиж чадав уу?
-Үгүй ээ. Тэгэхэд заан, бар усанд орчихоод баярлаад л хөөрхөн байсан шүү.
-Танайхан хэдүүлээ явж байгаа вэ. Аймгуудын хооронд юугаар явж байв?
-Хоёр том ачааны машинаар амьтдаа зөөж, харин циркчид нь машин, галт тэргээр явсан. Бүгд нийлээд 30 гаруй хүний бүрэлдэхүүнтэй.
-Хөрш хоёр орны циркчид ямар үнэ ханшаар тоглож байгаа вэ?
-Энэ удаагийн аялан тоглолт туршилтын журмаар явсан. Орлого, зарлага тэнцлээ. Хамгийн гол нь заан, бар гээд халуун орны амьтдыг монголчууддаа сонирхуулахыг зорьсон. Дараа жил Асар цирк-ийнхэн тоглолтоо үргэлжлүүлнэ гэж төлөвлөж байгаа. Циркчдийн нэг өдрийн цалин нийтдээ нэг сая 500 мянга болдог. Амьтад нэлээд өндөр хөлстэй тоглож байгаа.
-Циркчид нутаг буцахдаа юугаар явах бол?
-Галт тэргээр явчихна. Хятадынхан Замын-Үүд хүртэл галт тэргээр, цаашаа машинаар давхина.
-За баярлалаа. Замдаа сайн яваад ирээрэй.
-Баярлалаа.
Зууны мэдээ 179 (2627)
