Эрдэнэтийнхнийг ёстой хошгируулж байсан хүмүүсийн нэг нь. Ажлын байр бий болгоно. Жижиг дунд үйлвэрлэл хөгжүүүлнэ. Бага хүүтэй урт хугацааны банкны зээлээр дэмжпэг үзүүлнэ. Ядуурлаас салгана. Олон ч хүнийг гадаадад явуулна. Солонгост гаргана.

Төвлөрсөн орон сууцны халаалтыг сайжруулна. Говилын амын оршин суугчдыг гялайлгана. Тав тухтай амьдрах орчинг бүрдүүлнэ гээд л амлалт гэдгийг ар араас нь хөврүүлсэн хүн бол 2004 оны сонгуулийн үед яахын арга байхгүй нэр дэвшигч Г.Адъяа байлаа.

Гоё гоё амлалтанд нь итгэж МҮЭ-ийн холбооны ерөнхийлөгч байсан түүнийг өөрсдийнхөө дуу хоолой болно гэж Эрдэнтийнхэн хууртагджээ. Сонгогчийн санал гэдэг юу юунаас чухал болохыг одоол тэд ухаарчээ. Г.Адъяаг УИХ-д сонгочихоод нөгөө Буганд хоёр эврээ өгчихөөд харуулдаж нулимс унагаадаг тэмээ-ний үлгэр лүгээ адил болоод дөрөв дэхь жилтэйгээ Эрдэнэтийнхэн золгож байна.

Одоо түүнтэй тооцоо бодох цаг иржээ. Эрхэм түшээгээс таны амлалт хаана байна гэж асуухад юуны чинь амлалт миний хийдэг ажил биш. Наана чинь засаг захиргаа гэж нэг юм байдаг биздээ. Би хууль тогтоодог хүн болохоос биш аж ахуй эрхлэдэг хүн биш хэмээн томорч өгчээ.

Тэгэж аж ахуй эрхэлдэг гишүүд байдаг бол түүнээсээ наад асуудлынхаа хариуг аваарай. Ер нь би дахиж нэр дэвшихгүй ээ. Та нараас гуйгаад байх юм байхгүй хэмээн айлджээ.

Үнэхээр Г.Адъяа гэдэг гишүүн УИХ-д байгуулсан гавъяа гэж гялайхаар тоймтой юм байхгүй. Дөрвөн жил намынхаа Удирдах зөвлөлийн шийдвэрийг биелүүлж, огцорч байгаа сайдуудыг хамгаалах гэж сөрөг хүчин рүүгээ үе үе уураа барьж ядан улангасан дайрч байснаас өөрөөр хийсэн ажилгүй шахам бүрэн эрхийнхээ хугацааг дуусгаж байх шиг.

Г.Адъяа гишүүн МҮЭ-үүдийн холбооны ерөнхийлөгч байхдаа Нийгмийн даатгалын сангийн хөрөнгөнд хяналт тавих үүргээ биелүүлээгүй бас нэгэн хариуцлага алдсан сонгуульт албан тушаалтан байлаа.

Нийгмийн даатгалын нэрийн данснаас Төсвийн санхүүд 117 тэрбум төгрөгийг шилжүүлэн өгч, даатгуулагчдын санг хоослох шахаад байхад дуугаа хураасан бас нэгэн хүн нь шүү дээ.

Тэр үед Улсын нийгмийн даатгалын санг хувийн юм шиг хувааж цохиод байсан эдүгээ УИХ-ын гишүүн Ц.Сүхбаатар нарын хэсэг этгээдийн хууль бус үйлдлийг хөхиүлэн дэмжиж байсан хүн гэвэл Г.Адъяа.

Яагаад гэвэл МҮЭ-үүдийн холбоо Нийгмийн даатгалын сангийн мөнгөн хөрөнгийг хэрхэн зарцуулах эрхийг нь олгодог хяналтын үүргийг биелүүлдэг байлаа. Хууль томчуулд зусарддаг тулдаа Г.Адъяа хам хэрэг хүлээхгүй сугарч үлдээд байна.

Хэрвээ хууль үйлчилдэг тогтолцоо үүсвэл зуд ирэхэд хуц ухандаа гэгчээр Нийгмийн даатгалын сангийн зарцуулалтанд хяналт тавиагүй даатгалын санд хохирол учруулсан үйлдэл эс үйлдлээрээ Г.Адъяа ч бас хуулийн өмнө улалзах л ёстой хүний нэг нь шүү дээ. Хоосон амлалтаар холь явдаггүй. Үсрээд дөрвөн жилийн настайг гишүүн Г.Адъяагийн амлалтаас сургамж авууштай.

дугаар 096/116/