Нийт тохиолдлын 73 хувь нь буюу 487 нь 0-4 насны хүүхэд байна. Улаанбаатар хотод 125 хүн эмнэлэгт, 308 хүн гэрээр, 11 аймагт 63 хүн эмнэлэгт, 88 хүн гэрээр эмчлүүлж байгаа мэдээ ирлээ. Зургаан хүүхдийн биеийн байдал хүндэвтэр байгаа бөгөөд гуравт нь уушигны хатгаа, бусдад нь мөнингитийн шинж илэрч, 20 хүүхдийн тууралт идээлэх шинжтэй байна.

Шадар сайд М.Энхболдоор ахлуулсан Улсын Онцгой комисс хуралдан цагийн байдал, авах арга хэмжээний талаар хэлэлцлээ. Энэ өвчнийг дэгдэлт, оргил, буурах гэсэн гурван үед хуваагаад байна. Манай улсын хувьд дэгдэлтийн дунд үедээ яваа гэж мэргэжилтнүүд тайлбарлалаа. Харин оргил үе нь ирэх 6-7 сард байх болов уу гэж таамаглаж байна. Холбогдох байгууллагууд 20 өвчтөний 80 сорьцыг Япон улс руу шинжилгээнд явуулахад бэлэн болжээ. Өнөөдрийн байдлаар ариутгалын бодис, эм тариа хангалттай, төрийн тусгай албан хаагчдын нэгдсэн эмнэлэг, Зэвсэгт хүчний клиникийн төв эмнэлэгт нийт 120 ор бүхий нөөц тасаг бэлэн байдалд байна. Цаашид Халдварт өвчин судлалын үндэсний төвийн түргэн тусламжийн найман машиныг богино долгионы радио станцаар нэн даруй хангах, Нийгмийн эрүүл мэндийн хүрээлэнгийн лабораторийн вирус ялган дүйх чадавхийг сайжруулах, өвчлөл нэмэгдсэн тохиолдолд аймаг, орон нутаг ариутгалын бодис, эм, эмнэлгийн хэрэгслийн хангамж, нөөцөө нэмэгдүүлэх, нийслэл, орон нутаг хог цэвэрлэгээг хийж, орчны ариун цэврийг сайжруулахыг Онцгой комисс үүрэг болголоо. Онцгой комиссын өмнөх хурлаас хүмүүс, ялангуяа хүүхэд, залуусыг нэг доор бөөнөөр цуглахгүй байх, онцын шаардлагагүй бол олон нийтийг хамарсан арга хэмжээ зохиохгүй байх чиглэлийг холбогдох байгууллагуудад өгсөн.

Гар, хөл, амны өвчин гарснаас хойш Засгийн газар гурван удаа хуралдан ХӨСҮТ-ийн эрчимт эмчилгээний тасагт 305 сая төгрөг гаргаж шаардлагатай тоног төхөөрөмж, ариутгалын бодис, эм авахад нь туслалцаа үзүүлжээ. Өвчлөл ихтэй байгаа Налайх, Багануур дүүрэг, Төв, Сэлэнгэ, Дорноговь аймгаас гадна хилийн дөрвөн боомтод мэргэжлийн эмч ажиллаж байна.

дугаар 096/116