Бэйчуань хотын ойролцоох голын ус эргээсээ даван хальсан учир хотын хүмүүс гэр орноо орхин өндөр газар руу нүүж байна. Хүмүүсийг үй олноор нь нүүлгэж байгаа учир хотод аврах ажиллагааг зогсоосон байна. Орон нутгийн удирдлага ойр хавийн суурины хүмүүсийг өндөрлөг газар руу нүүхийг уриалж байна.

Албан ёсны мэдээгээр 29500 хүн амиа алдсан гэж байгаа ба эрх баригчид энэ тоог 50 мянга хүртэл өсч магадгүй гэж хэлж байна. Нуранги дор дарагдсан хүмүүсийн тоог 14 мянга гэжээ. Гамшигт нэрвэгдсэн нутаг оронтой холбоо тогтоосны дараа энэ бүсэд таван сая орчим хүн гэр оронгүй болсныг мэдээлжээ. Хэлмэгдсэн хүмүүсийг аврах, амьд үлдэгсдэд нь туслахыг Хятадын ерөнхийлөгч Ху Жиньтао өнгөрсөн баасан гарагт уриалсан байна. Хятадын дарга баасан гарагийн өглөө Сычуань мужид хүрэлцэн ирсэн юм. Нийт 7000 сургуулийн байр нуран олон тооны хүүхэд нуранги дор үлдсэн нь хамгийн их анхаарал татсан асуудал боллоо. Барилгачдын хуурамч ажиллагаа нь ийм олон сургуулийн байр нурахад хүргэсэн гэж Хятадын хэвлэлд өгүүлж байгаа ба Засгийн газар нь энэ талаар шалгалт хийж эхэлсэн байна.

Хятадын аврагчдаас гадна Орос, Сингапур, Өмнөд Солонгос, Япон, Тайвань, Гонконгийн аврагчид гамшигт нэрвэгдсэн мужид ажиллаж байна. Өнгөрсөн баасан гарагт энэ нутагт дахин газар хөдөлжээ. Америкийн мэргэжилтнүүдийн тооцоолсноор газар хөдлөлтийн хүч нь Рихтерийн шаталбараар 5,5 балл болсон байв. Энэ газар хөдлөлт хөрсний нүүлт дагуулжээ. Төв нь даваа гарагийн газар хөдлөлтийн төвийн орчим 10 км-ын гүнд байжээ. Хөрсний нүүлтэд хэдэн хэдэн машин дарагдсан ба шуурхай холбооны ажиллагаанд саатал гаргасан байна. Тавдугаар сарын 12-ны газар хөдлөлтөд нэрвэгдсэн нутгийн зарим хэсэг нь дахин хаагдсан байна.

дугаар 096/116