Энэхүү билэгт сайн өдөртэй давхцан нийслэлд дахин нэг шинэ зурхайн дацан үүдээ нээсэн юм. Хуучнаар Гэсэр сүмийн хойд талд сүндэрлэн боссон нь энэ Түвдэнпэлжээлин монгол зурхайн дацангийн нээлтийн арга хэмжээнд төр засгийн өндөрлөгүүдээс гадна урлаг соёл, нийгмийн томоохон зүтгэлтнүүд хүрэлцэн ирж оролцлоо.

Хамгийн отгон зурхайн дацангийн хамба лам Ж.Гончигсүрэн Түвдэнпэлжээлйн хийдийнхээ онцлог талуудыг дурьдахдаа Монгол зурхайн ёсоор буяны ном хурж, залуу лам нарт бурханы номыг сургаж өвлүүлэн үлдээх, олныг хамарсан сургалт явуулах гээд л яриад байвал нэлээд олон зүйл байгаа гэсэн. Хамгийн гол нь сүсэгтэн олны тусын тулд энэхүү дацан нээгдэх болсон нь сайхан хэрэг ажээ.

Будаг нь ханхалсан шинэ хийд олны хөлд дарагдаж тэдэнд зориулсан буяны номыг лам нар нээлтийнхээ үеэр уншиж өгсөн. Мөн нээлтийн ёслолд хүрэлцэн ирсэн бүх хүнийг босоо хүлээн авалтад урьж цайлж байсан юм. Хурсан олонд тус дацангаас гаргасан цаг тооны бичгийг үнэ төлбөргүй тарааж байв. Харамсалтай нь үнэ төлбөргүй тараасан цаг

тооны бичгийг зарим нэг ашиг хонжоо хайгчид олноор нь аван үнэд хүргэн зарж байсан нь харамсалтай санагдсан.

Энэ өдөр үйлдсэн буян хожим хэдэн зуун мянга дахин өсч үрждэг гэж номын их багш нар айлдсан байдаг. Мөн Бурхан багшийн их дүйчин өдрийн үдэш бейсболын талбайд гэрэлт зул өргөх ёслолын ажиллагаа давхар болох аж. Уг арга хэмжээ нь манай улсад анх удаа болж байгаагаараа онцлог гэнэ. Нийт 10000 гэрэлт зул өргөхөөс 2000-ыг нь тэнгэрт хөөргөх юм байна.

Дугаар 096 /469/

Б.Зул