Уг төсөл нь 12 жилийн хугацаанд гурван үе шаттайгаар хэрэгжих Тогтвортой амьжиргаа хөтөлбөрийн нэг хэсэг гэнэ. Эхний үе шат нь Дэлхийн банкны санхүүжилтээр амжилттай хэрэгжиж дуусчээ. Тэгэхдээ найман аймагт хэрэгжүүлсэн бөгөөд тэрхүү ажлын туршлага дээрээ тулгуурлан Монгол Улсын бүх аймаг, суманд өргөжүүлэн хэрэгжүүлэхээр болжээ. Төслийг Дэлхийн банкнаас 33 сая ам доллар, Европын холбоо 10 сая ам.доллар, Японы Засгийн газраас олгож байгаа Бодлогын болон Хүний нөөцийн хөгжлийг дэмжих буцалтгүй тусламжаар 3,9 сая ам доллар, Засгийн газраас 1.1 сая ам.доллараар санхүүжүүлжээ. Газар, газрын сайн санаатнуудын буянаар Тогтвортой амьжиргаа төсөл дараагийн үе шат хэрэгжих болоод байгаа нь талархууштай.

Уг Төслийн нээлтэд Сангийн сайд Ч.Улаан, УИХ-ын гишүүн Т.Ганди, Дэлхийн банкны суурин төлөөлөгч Аршад Саеид, Европын Холбооны Бээжин дэх төлөөлөгчийн газрын дэд тэргүүн Майкл Пулыи, Япон улсаас Монгол Улсад суугаа Элчин сайд Я.Ичихаши болон эх орныхоо хөгжилд хувь нэмрээ оруулагч зочид хамтран оролцжээ. Хэдийгээр Монгол Улс сүүлийн жилүүдэд хурдацтай хөгжиж байгаа нийгэмд тулгамдаж буй олон асуудал байдаг. Ядуурал буурах урагштай чиг хандлага гарч байгаа ч улсын хэмжээнд авч үзвэл нийгмийн давхрагын зөрүү их байна. Монголын нийт хүн амын бараг тал хувь нь амьдардаг хөдөө орон нутагт ядуурлын төвшин өндөр байна. Тэр дундаа нүүдэлчин малчин өрхүүд эмзэг бүлгийн дийлэнх хувийг эзэлж байна. Тиймээс төслийн гол анхаарах зүйл нь хөдөө орон нутгийн иргэдийн оролцоог нэмэгдүүлэх, тэдний гол тулгамдаж байгаа асуудлуудыг шийдвэрлэхэд оршино.

Тогтвортой амьжиргаа төслийн эхний хэсэг нь малчдын аюул, ослыг багасгах, гэнэтийн цаг агаарын өөрчлөлтөөс болж гаргасан хямралыг Засгийн газар хурдан шуурхай тэмцэх чадавхиа дээшлүүлэх, орон нутгийн төвшинд иргэдийн оролцоо түүний хувь нэмрийг өсгөх, мөн өрсөлдөхүйц хэмжээний зээлийн үйлчилгээг авах боломжийг нэмэгдүүлэх зэрэг шинэлэг арга барилыг нэвтрүүлж чаджээ. Дэлхийн банк нь Монгол Улсын Засгийн газарт эхний үе шатнаас авсан сургамжийг бүтэц, зохион байгуулалтын хэмжээнд бүрдүүлэхийн хажуугаар бусад хандивлагч байгууллагуудын дэмжлэгтэй нэмэлт үйл ажиллагаануудыг уялдуулан зохицуулахад туслалцаа үзүүлэх гэнэ. Уг төсөл нь хөдөө, орон нутгуудад эрүүл мэндийн болон боловсролын байгууллагын чадавхийг сайжруулах санхүүгийн үйлчилгээ авах боломжийг нээх бэлчээрийн мал аж ахуйн эрсдэлийн удирдлагыг дээшлүүлэх зэргээр хүн амын амьжиргааг дэмжихэд амжилт үзүүлсэн ээлжит шат байх болно гэж төслийн багийн удирдагч Андру Гүдланд мэдэгдлээ.

Төслийн хүрээнд санхүүжүүлэх үйл ажиллагааг дөрвөн бүрэлдэхүүн хэсэгт хуваах аж. Бэлчээрийн мал аж ахуйн эрсдэлд бэлтгэлтэй байх, олон нийтийн санаачилга, нийтийн эзэмшлийн байгууламжийг сайжруулах жижиг төслүүдийг тодорхойлох хэрэгжүүлэхэд иргэдийг чадавхжуулах, оролцуулахад чиглэх гэнэ. Мөн ил тод нийгэмдээ чиглэсэн үндэсний хэмжээний арга механизмыг бүрдүүлэх, бичил санхүүгийн хөгжил, санхүүгийн тогтвортой үйлчилгээг хөдөөгийн иргэд хүртэх боломжийг өргөжүүлж, гүнзгийрүүлэх, чадавхи бэхжүүлэлт ба төслийн удирдлага төслийн бүх үйл ажиллагааг үр дүнтэй хэрэгжүүлэхээр бэлтгэлээ базаажээ. Уг төсөл нь Тогтвортой амьжиргаа төслийн төв ажлын байр болон аймаг, сумдад байрлах ажлын байруудаар дамжин, 2008- 2012 он хүртэлх дөрвөн жилийн хугацаанд хэрэгжихээр болжээ.

Д.Баяр

Дугаар 111/2398/