Харин одоо яах ч аргагүй болсон тул аль болох хямд үнэтэй худалдааны төвийг зорьдог болжээ. Гэвч хаа сайгүй бараа, бүтээгдэхүүний үнэ тэнгэрт хаджээ. Нарантуул, Барс худалдааны төвийн өргөн хэрэглээний барааны үнийг сонирхож, борлуулагчидтай нь хөөрөлдлөө.

НАРИЙН БООВ,ГУРИЛАН БҮТЭЭГДЭХҮҮНИЙ БӨӨНИЙ ЦЭГИЙН БОРЛУУЛАГЧ Ш.БУЯНДЭЛГЭР ҮНЭ НЭМЭГДЛЭЭ ГЭЭД ИДЭЖ УУХАА БОЛИЛТОЙ БИШ

– Гурилан бүтээгдэхүүний үнийн өсөлт хэд хүрээд байна вэ?

-Нарийн боов, гурилан бүтээгдэхүүн урьд өмнөх үнээсээ бараг нэг нугараад байна. Урьд өмнө Өгөөж-ийн еэвэн нэг уут нь 1400-1500 төгрөг байсан бол одоо бөөний үнэ нь 1600-д хүрсэн.

-Өргөн хэрэглээний барааны үнэ өссөн өнөө үед борлуулалтад ямар нэгэн хэмжээгээр өөрчлөлт орж байх юм уу?

-Мэдээж оролгүй л яах вэ. Гэхдээ гурилан бүтээгдэхүүн хүний өдөр тутмын хэрэглээ учраас авахаас өөр аргагүй байдаг. Үнэ нэмэгдсэн гээд идэж уухаа хасахгүй шүү дээ.

-Үнийн өсөлтийн талаар урьдчилсан ч юм уу ямар нэгэн байдлаар мэдээлэл авах боломж байдаг уу?

-Бидэнд урьдчилан мэдээлдэггүй. Өөрсдөө хэвлэл мэдээллээс олж мэддэг. Миний ойлгож байгаагаар үнийн өсөлт бол дэлхий нийтэд тулгамдаад байгаа асуудал. Нөлөөлөх гол хүчин зүйл нь дэлхийн зах зээл дээр нефтийн үнэ өссөнтэй холбоотой гэж үзэж байна.

УBC АЙМГИЙН БОРЛУУЛАГЧ Ч.ЛУВСАН ХӨДӨӨД ҮНЭ ӨССӨНӨӨС БОЛООД ӨР, ЗЭЭЛТЭЙ ХҮН ОЛШИРЛОО

-Увс аймаг болон хөдөө орон нутагт үнийн өсөлт хэр нөлөөлж байна вэ?

-Маш их хэцүү байна. Хэрэглээ болохоор яах аргагүй л авна. Манай аймаг Улаанбаатараас 1000 километрийн зайд байдаг. Сард нэгээс хоёр удаа бараагаа татдаг. Үнэ нэмэгдсэнээс болж хүмүүсийн зээл авах нь ихэссэн. Бөөн өр зээл нэхэж, гуйсан улс л байна.

-Хүнсний бүтээгдэхүүнээс өөр ямар бараа татаж байна вэ?

-Барилгын материал татдаг. Уг нь барилгын материалын үнийн өсөлт эхэндээ гайгүй л байсан. Одоо бас л ялгаагүй нэмэгдсэн. Бид чинь тэгээд үнээ дорвитой нэмдэггүй. 20-30 хувь нэмээд л тээврийнхээ зардлыг гаргаж авна. Өргөн хэрэглээний барааны үнэ нэмээд байгаа хэдий ч тээврийн зардал төдийлөн нэмээгүй. Нэг тонн ачааг 70 мянгаар тооцоод бензин тосонд 150-200 мянгыг өгдөг. Ер нь гол төлөв жолоочтойгоо л тохиролцоод явна даа.

ӨВӨРХАНГАЙ АЙМГИЙН БОРЛУУЛАГЧ Г.ГЭРЭЛСАЙХАН БАРАА БҮТЭЭГДЭХҮҮНИЙ ҮНЭ ӨДӨРТ Л 10-1000 ТӨГРӨГӨӨР НЭМЭГДЭЖ БАЙНА >

-Та нарт бараагаа татдаг өөрийн гэсэн цэг байдаг уу?

-Байнга худалдан авсаар байгаад өөрийн гэсэн цэг бий болгодог. Тэгээд ч өөрийн гэсэн цэгтэй гээд хямд авч чадахгүй шүү дээ. Өсөөд байгаа үнээр авна. Гурил килограммыг нь 800 төгрөгөөр аваад 900 төгрөгөөр ургамлын тосыг 2500 төгрөгөөр аваад 2800 төгрөгөөр зардаг. Ердөө л 10-20 хувь нэмээд л борлуулдаг. Манай Өвөрхангай Улаанбаатарт харьцангуй ойрхон байдаг ч бензиний үнэ өндөр байгаа болохоор явахад улам л хэцүү болоод байна. Урьд нь юмны үнэ тогтвортой байхад бараагаа урьдчилаад тооцоог нь гаргачихдаг байсан бол одоо тэгэх арга байхгүй болсон. Өдөр болгон л 10, 20 бүр 500, 1000-аар ямар ч шалтгаангүйгээр нэмдэг болжээ. Хөдөө, орон нутгаас бараа татдаг бидэнд ихээхэн хүндрэлтэй байна. Хайрцагтай болон шилэн бүтээгдэхүүн тээвэрлэлтийн явцад эвдэрч очдог. Тэр болгоныг зарахгүй байж болохгүй, аргалж засаад л зарахыг боддог. Энэ байдал нь манай худалдааны төвд сөргөөр нөлөөлдөг. Тээвэрлэлтийн хувьд жолоочтойгоо тохиролцож байгаад тонныг нь 50-60 мянган төгрөгөөр ачдаг. Нэг удаагийн тээвэрлэлтээрээ 10-12 тонныг ачдаг. Барилгын материал хүнд байдаг учраас хүнсний бүтээгдэхүүнээ авч чадаагүй байтал тоннын хэмжээ нь тулчихдаг.

-Үнийн өсөлтийг бууруулахын тулд ямар арга хэмжээ авбал зохилтой гэж бодож байна вэ?

-Үнийн хөөрөгдлийг багасгахын тулд дотоодын бүтээгдэхүүнийг хэрэглэвэл зохимжтой болов уу. Манайхан дэлхийн зах зээл дээр тун бага үнийн өсөлт бий болоход түүнийг нь хэт хөөрөгдөн утга учиргүй юмныхаа үнийг өсгөдөг.

Б.Болорчимэг

А.Нандинзаяа

Дугаар 111/2398/