-Гранд хамтлаг, Гранд уран бүтээлийн нэгдэл болон өргөжиж зүүн бүсийн аймгуудаар тоглоод ирлээ. Аяллын сониноос дуулгаач?

-Манай продюсер Баттөр ахын уран бүтээлийн тоглолт арваннэгдүгээр сард болсныг уншигчид санаж байгаа байх. Тэрхүү Амьдрал тоглолтоо хөдөө орон нутгийнхандаа толилуулаад ирлээ. Бид Гранд уран бүтээлийн нэгдэл болон өргөжиж, хорь гаруй уран бүтээлчтэй томоохон бүрэлдэхүүн явснаараа онцлог байлаа. Хөдөө орон нутгийн үзэгч сонсогчид Гранд хамтлагийг, манай продюсер Баттөр ахын сайхан аялгуутай бүтээлүүдийг маш сайн мэддэг болсон байна лээ. Хамтдаа дуулаад их сайхан байсан шүү. Амьд тоглолт хийхийн тулд бүх техник хэрэгслээ аваад их нүсэр бүрэлдэхүүнтэй явсан. Түүнийг маань ч үзэгчид мэдэрч, ойрын хэдэн жил ийм тоглолт ирээгүй гэж байсан шүү. Би бүх дуугаа амьд хөгжимтэй дуулсан. Хоолой маань ядарч сөөх болов уу гэж их санаа зовж байлаа. Хэрвээ хоолой сөөсөн бол үзэгчид шинэ залуу дуучны маань хувьд хүлээж авахгүй байсан байх. Харин гавьяат Сараа эгч Ариунаа эгчийн хоолой өвдчихсөн байвал нэгэнт хүлээн зөвшөөрөгдсөн том дуучид учраас ойлгох байлгүй. Тэгэхээр би алдах эрхгүй л гэж бодож байсан. Гэхдээ хоолой нэг их ядраагүй ээ.

-Гранд уран бүтээлийн нэгдэл-д ямар уран бүтээлчид шинээр оров. Багийн бүтцийн талаар сонирхуулахгүй юу?

-Манай нэгдэлд Гранд хамтлагийн үндсэн уран бүтээлчдээс гадна үндэсний язгуур урлагийн уран бүтээлчид орсон. Тухайлбал, ардын бүжигчин, хос уран нугараачид, морин хуурч зэрэг урлагийн бусад салбараас төлөөллүүд багтсан байгаа. Хэрлэн ах, New star студийн продюсер Гантөр ах манай хамтлагт бас байгаа. Мөн Никитон хамтлагийн бөмбөрчин байсан Золбоо ах, басс гитарчин Цогоо ах гээд бүхий л мэргэжлийн хөгжимчид багтсан. Манайд үнэхээр мэргэжлийн урдаа барьдаг сайн хөгжимчид цугласан шүү. Миний хувьд эдгээр ах эгч нараасаа суралцсаар л явна даа.

-Гранд уран бүтээлийн нэгдэл-ийг байгуулах болсон шалтгаан нь юу юм бэ. Уран бүтээлийн нэгдүгээр нэгдэл гээд хэсэг залуус нэгдсэн. Тэрийг дуурайчихсан юм шиг, нэр нь ч?

-Дуурайх юу байхав дээ. Манай нэгдэлд олон салбарын уран бүтээлчид ажиллах боллоо. Монголын урлагийн холбооноос Итали, Австри, Германд тоглох хүсэлтийг манай продюсер Баттөр ахад тавиад зохион байгуулж өгөөч гэсэн юм билээ. Тэгээд зөвхөн Гранд хамтлаг дангаараа явснаас үндэсний урлагаа гадаадад сурталчлах баг бүрдүүлж явъя гэсэн үүднээс энэ бүрэлдэхүүнийг бий болгосон юм. Сая хөдөө явахад энэ нэгдлээс маань хос уран нугараач Ансуяа, Дулмаа гэж эгч дүү хоёр явсан. Тэд гайхалтай авьяастай, уран нугаралтын үзүүлбэрээс гадна үндэсний бүжиг, араб бүсгүйн биелгээ зэргийг хийж олны талархлыг хүлээсэн. Түүнчлэн Miss Mongolia-2007-гийн Фото мисс Ариун-Учрал, Инээмсэглэл мисс Баасанжаргал гэж хоёр бүсгүй явж Гоо бүсгүй дууг дуулж сайхан монгол бүсгүйн намба төрхийг харуулж сюрприз барьсан.

-Ингэхэд та хоёр жилийн өмнө анх хотод орж ирж байсан билүү. Эргээд харахад энэ хугацаанд уран бүтээлийн тухайд болон хувь хүнийхээ зүгээс хэр өөрчлөгдөв?

-2006 онд манай хамтлаг байгуулагдсан. Миний хувьд маш их зүйл өөрчлөгдсөн. Yүнд хамгийн түрүүнд манай Баттөр ахын нөлөө, хамтлагийн ах эгч нарын маань тус дэм, гуравдугаарт миний өөрийн хичээл зүтгэл нөлөөлсөн болов уу гэж боддог. Энэ дашрамд хүмүүстээ маш их баярлаж явдгаа танай сониноор дамжуулж хэлмээр байна.

-Амьдрал-ыг хүмүүс сайхан дуу гэлцдэг. Өөрийн чинь бодлоор яг юугаараа мундаг дуу юм бэ. Сонсогчдод юу нь илүү таалагдсан гэж бодож байна вэ?

-Би энэ дууг үнэхээр гайхалтай уран бүтээл гэж боддог. Мориор бол уяа сойлго нь таарсан гэдэг шүү дээ. Yг, ая, хөгжим гурав маш сайн зохицож, нэг нэгэндээ ууссан тийм л дуу. Тэгээд ч энэ уран бүтээлийг хийсэн Баттөр ах дотоод сэтгэлдээ амьдралын эрээн барааныг эргэцүүлж олон жил төсөөлж хадгалж явсан гэдэг. Клип нь ч сайн уялдаж чадсанаараа олон хүнд хүрсэн юм болов уу даа. Анх энэ дууг надад өгөхөд би дуулж амьдруулж чадах болов уу гэж их эмээж, өөртөө итгэлгүй, шантрах ч үе гарч байсан л даа. Гэсэн ч Баттөр ахтайгаа энэ дуун дээр маш удаан ажилласан. Надад амьдралын талаар төсөөлөөд дуундаа орж дуулахыг л их зөвлөж байсан.

-Клипний тухайд Баттөр захирлын өөрийнх нь амьдралаас сэдэвлэсэн гэх яриа гарч байсан. Энэ тал дээр хариулт өгөөч?

-Зохиолыг нь Баттөр ах өөрөө бичиж, Zaya Sh студийн Даваахай ах хийсэн. Яг бодит байдал дээр бол энэ яриа худлаа л даа. Манай Баттөр ахын хамгийн ойр дотно хүн болох бүр багынх нь найз Одсайхан гэж ах байдаг юм. Тэр хүний туулсан амьдралаас сэдэвлэсэн гэдэг. Одсайхан ах одоо Жигүүр гранд группт ажилладаг. За энэ клипний талаархи эргэлзээ ингэж тайлагдлаа.

-Гранд хамтлагийг зөвхөн продюсерийнхээ л зохиосон дууг дуулдаг гэсэн ойлголт олны дунд төрж байна. Нэг тогоочийн хоолны амт адил гэдэг шиг уран бүтээлүүд тань нэг хэлбэрт орчихож байгаа юм биш үү. Өөр уран бүтээлчидтэй хамтарч ажиллах уу?

-Тийм ээ. Манай продюсер Баттөр ах аяа зохиодог, үгээ ч бичдэг. Мөн Хүрлээ ах ая зохиодог шүү дээ. Хамтлаг дотроосоо л өөрсдийнхөө уран бүтээлийг гаргана гэсэн зорилготой болохоор тэр л дээ. Одоохондоо адил төстэй болоод байна гэсэн шүүмжлэл бидэнд сонсогдоогүй л байна.

-Тэгвэл шинэ уран бүтээлүүдээс чинь өөр өнгө аяс харагдах байх. Өөр сонин сайхан юу байна даа?

-Бид зургадугаар сард юм уу, наадмын дараа баруун бүсийн аймгуудаар тоглолт хийх төлөвлөгөөтэй байгаа. Амьдрал тоглолтын маань DҮD бараг бэлэн болсон. Мөн поп, классик, уянгын чиглэлийн шинэ уран бүтээлүүдээрээ цомог гаргахаар ажиллаж байна. Зургадугаар сарын сүүлчээр худалдаанд гарчих болов уу даа.

-Танайх том группын дэргэдэх хамтлаг. Уран бүтээлчид үндсэн цалинтай байдаг уу. Эсвэл тоглолтын ашгаасаа хувь авдаг юм уу?

-Бид үндсэн цалин авдаг. Энд тэндээс бидэнд урилга ирдэг л дээ. Манай продюсертэй тохироод, бид тоглодог. Тэр үед бид өөрсдөө л орлогоо авдаг юм.

-Одоо сонгуулийн ажил эхэлчихлээ. Сурталчилгаанд дуулуулах санал хүсэлт их ирж байгаа биз дээ?

-Нуулгүй хэлэхэд Чи ганцаараа ирээд дуулаад өгөөч ээ энэ тэр гэсэн санал ил, далд их ирж байна. Энд албан ёсоор хариулахад би яагаад ч ганцаараа очиж дуулж чадахгүй. Энэ дан ганц миний уран бүтээл биш, ард маань маш олон хүнтэй баг ажилладаг. Би тэднийхээ хөдөлмөрийг хэдхэн цааснаас арилжиж чадахгүй ээ. Ганцаараа бол би хаашаа ч хөдлөхгүй. Явбал продюсерийнхээ зөвшөөрлөөр хамтлагаараа л очино. Бид тэр хүний удирдлага дор ажилладаг учраас дангаараа том толгой гаргах боломж байхгүй. Мөн хонхны баяр болж байна гээд найзуудаас их санал ирлээ. Гэхдээ би тэдэнд энэ байдлыг ойлгуулахыг хичээдэг. Манай найзууд ч ойлгож байгаа байх.

-Зарим хүнд Гранд хамтлагийнхан их хатуу гэрээтэй ажлладаг юм байна гэх ойлголт төрж байгаа байх?

-Би үүнийг ажил бол ажил, хувийн асуудал бол хувийн асуудал л гэж хэлмээр байна.

-Нутаг руугаа явж байна уу, аав ээж тань хаана байгаа вэ?

-Нэгдүгээр сард яваад ирсэн. Аав, ээж маань Өвөрхангайдаа байгаа.

-Мэргэжил боловсролын тал дээр ямар шийдэлд хүрч байна вэ?

-Залуу хүний хувьд мэргэжил боловсролын тал дээр маш их анхаарах хэрэгтэй гэж боддог болсон. Дуулахын хажуугаар хэл сурах гэж үзэж байна. Түүнчлэн дуулах сургуулилтаа хийж гавьяат жүжигчин Насантогтох багшийнхаа удирдлаганд гамм уншаад, дуучин Хэрлэн ахаараа ч их зүйл заалгаж байгаа.

-Ажилтайгаа ойрхон амьдардаг уу?

-Yгүй, ТБД андууд орчимд.

-Танай бэлтгэл хийдэг газар нэлээд зайтай байх аа, унаатай болсон уу?

-Болоогүй ээ.

-Жолооч болоогүй юм уу?

-Харин тийм, удахгүй унаатай болно доо.

-Найз бүсгүйтэй болж амжив уу. Хайр сэтгэлийн тухайд ямар бодолтой явдаг вэ?

-Өдөр болгон гоё хайртай учрахсан гэж боддог. Одоохондоо найз охингүй, ганцаараа л байна. Гэхдээ манай Монголд сайхан охид зөндөө. Гоё гоё бүсгүйчүүд зөрөхөд эргэж харахгүй байхын аргагүй шүү дээ.

А.Анужин

Дугаар 98/417/