Тэгээд харилцаагаа улам бэхжүүлэхийн оронд харин ч хэнэггүй байдлаас болж баллаж орхидог. Эр хүн гэдэг эмзэг тул өчүүхэн жижиг зүйлсийг ч өөрийнх нь эрхэнд халдах гэсэн оролдлого хэмээн хүлээн авдаг гэнэ. Тэр байтугай охид, бүсгүйчүүдийн гаргадаг алдаанаас болоод өгөөш үмхсэн сүйт хархүү ч хуримаас бултчихдаг аж. Иймээс гал голомтоо бадрааж буй залуу хос болон бүх насныханд зориулан сэтгэл судлалын чиглэлээр зөвлөгөө өгдөг Хамтдаа ярилцая төвийн сэтгэл судлаач Р.Минжин бүсгүйчүүдэд хандан хайртай хүнтэйгээ насан туршдаа аз жаргалтай байхын тулд юунаас эхлэх хэрэгтэйг зөвлөж байна.

Эрчүүд эмэгтэй хүнтэй, харьцахдаа юунд цочирдог вэ? Уяатай мэт байнга холбоотой байж, утсаар хаана юу хийж буйгаа тогтмол тайлагнан, хэзээ гэртээ харихаа мэдээлж байх шаардлагатай болдог нь тэднийг цочроодог. Иймээс бүсгүй Та сүйт хархүүгээ айлгахгүйн тулд сэтгэлээ барьж, хүссэн үедээ биш хааяа ч гэсэн тэсч байгаад утасдах хэрэгтэй шүү.

Хурим ба хүүхдийн тухай яриа бол бүсгүйчүүдийн ярих дуртай сэдэв. Харин эрчүүдийн хувьд хамгийн хүнд сэдэв. Яагаад гэвэл, эр хүн сайхан бүсгүйг эргүүлж байхдаа эхлээд зөвхөн энгэр зөрүүлэхийг боддог. Хэрэв энэ үед түүнд хуримаа хэрхэн хийх, төрөх хүүхдэд ямар нэр өгөх тухай яривал харилцаа төвөгтэй болно. Харин сүйт хархүү тань хурим хийх талаар санал гаргасан тохиолдолд энэ яриаг үргэлжлүүлж болно.

Мөн нөхрөө найз нартайгаа уулзахыг нь хориглох хэрэггүй. Гэр бүл зохиохоор шийдсэн эрчүүд үүнийг эмзэг хүлээж авдаг. Хааяа найзуудтайгаа уулзсан ч цагаа хараад, гар утас дуугарсан ч давхийгээд л. Эр нөхрөө гэртээ байхгүй бол бүсгүйчүүд тэднийг өөрийнхөө өмнө гэм буруутай гэж итгүүлж чаддаг авъяастай. Гэхдээ энэ авъяасыг болгоомжтой ашиглах хэрэгтэй. Эс тэгвэл эр хүн харсан зүгтээ явах, үгүй бол мэдрэлийн өвчтэй ч болж мэднэ.

Өхөөрдсөн нэр өгөх

Дотно хүмүүс бие биеэ энхрийлсэн, өхөөрдсөн нэрээр дуудах нь хэвийн үзэгдэл. Харин хөндлөнгийн хүний дэргэд бамбарууш, туулайхан гэж дуудвал нөхөрт тань таалагдахгүй нь лавтай. Эр хүн олны өмнө өөрийгөө хэзээд баатар, дайчин эр мэт үзэгдэхийг хүсдэг болохоос зөөлөн тоглоом шиг харагдуулахыг хүсдэггүй.

Ирээдүйн төлөвлөгөө

Ирээдүйн хамтын амьдралаа төлөвлөнө гэдэг зорилготой байх хэрэг мөн ч энэ сэдвээр байнга ярих нь эр хүнд дарамт болдог. Ер нь эр хүн үргэлж буцах, бултах арга зам эрэлхийлж, бүр арга ядсан үед амьдралаа шинээр эхлэх боломжийг хүртэл хайдаг. Хэрэв түүнд хувь заяаг нь хэдийнэ шийдчихсэн гэж ойлгуулбал тэр хямралд автан, лаа шиг л хайлан урсана. Иймээс хэтийн төлөвлөгөөгөө нууж явахад гэмгүй. Эсвэл эр хүнийг аятайхан гуй. Тэгвэл тэр таны хүссэн болгоныг хийнэ. Харин Та гэрийн эзэгтэйн үүргээ сайн гүйцэтгэж байх хэрэгтэй шүү. Учир нь, эрчүүд өөрийн бүтээсэн баялагдаа хайртай тул түүнийг хайрласан хүнд хэзээд таатай байдаг. Мөн арвич, хямгач бай. Хэрэв нөхрийн тань нүдэнд цахилгаан зуух асаалттай, хоолны үлдэгдэл дэндүү их, утсаар байнга ярьж, усаа их гоожуулж байгаа харагдвал уурлахгүй ч бухимдаж эхэлдэг. Бухимдал нэмэгдээд байвал сайн зүйл хэзээ ч авчрахгүй. Иймээс энэ мэт ахуйн жижиг зүйл дээр аль болох оноо алдахгүйг хичээгээрэй.

Ж.СYРЭН

дугаар 096