С.Жартарсон Исландын Бэлэг эрхтний музейн эрхлэгч. Түүний цуглуулгад 70 кг жинтэй, 1.7 метр урт салай халимны бэлэг эрхтнээс томруулдаг шилээр л харж болохуйц гөлчгийний хоёрхон мм урт бэлэг эрхтэн хүртэлх 90 гаруй төрлийн 261 амьтны бэлэг эрхтэн бий. С.Жартарсоны жигтэй хобби 1974 оноос эхтэй. Харин 30 гаруй жилийн хугацаанд хүний эрхтэн л олж чадаагүй түүнд герман, америк, исланд, британи эрчүүд элмо-гоо бэлэглэхээ амласан гэнэ. Энэ нь эрхтнээ санал болгосон 52 настай америк эрийн музейд мөнхжүүлэхээр зэхэж буй эрхтэндээ өгсөн нэр. Харин 93 настай исланд эр хүүхэмсэг нэгэн бөгөөд зургаан ч удаа гэрлэсэн. Тэрбээр дэлхийд ганц музейд эрхтнээ дурсгавал дурлалд тэмүүлэгч дур хүсэл нь мөнхийн залуугаараа үлдэнэ гэдэгт найдаж байгаа гэнэ.

С.Жартарсоны өвөрмөц музей 1997 онд Исландын нийслэл Рикьяавик хотод үүдээ нээжээ. Харин хэдхэн жилийн өмнө тус хотоос зүүн хойд зүгт 480 км-т орших Хюсавик хот руу нүүсэн байна. Тавдугаар сараас есдүгээр сарыг дуустал нээлттэй байдаг Бэлэг эрхтний музей байгалийн үзэсгэлэн бүрдсэн нуурын эрэгт оршдог. Жилээс жилд тус музейг зорих жуулчдын тоо нэмэгдсээр байгаа бөгөөд зорин ирэгсдийн 60 гаруй хувь нь эмэгтэйчүүд гэнэ. С.Жартарсоны өгүүлснээр дөрөвхөн сарын хугацаанд 6000 гаруй жуулчин музейд нь зочилдог.

Тэрбээр үзмэр бүрээ судлаач, эрдэмтэн, анчдаас бэлгэнд авчээ. Харин зураг дээрх зааны нэг метр урт бэлэг эрхтэнг л худалдаж авсан гэнэ.

Түүний музейд садар самууныг сурталчилсан нэг ч зүйл байхгүй. Мөн нүцгэн нэгний зураг сэлт ч харагдахгүй. Өвөрмөц нэртэй л болохоос байгалийн түүх, ан амьтны физиологийн ялгааг энэ музейгээс л харж болох гэнэ. С.Жартарсан ч мөн ийм л зорилгоор музейгээ байгуулсан гээд Амьд биет бүр үр төлөө үлдээхийн тулд амьдардгийг, их бага гэлтгүй бид бүгдээрээ адилхан гэдгийг л харуулахыг зорьсон гэжээ.