Ерөнхийлөгч Н.Энхбаярыг хамт сурч байсан нэг ангийнх нь андууд, багш нар нь угтан авч, халуун дотноор мэндчилсний дараа тус сургуулийн захирал хүндэтгэн, хүлээн авч уулзлаа. Уулзалт А.М. Горькийн нэрэмжит Утга зохиолын дээд сургуулийн сургалтын өнөөгийн байдал, хэтийн зорилтоос Ерөнхийлөгч Н.Энхбаярын оюутан цагийн дурсамж хүртэл өргөн сэдэв хүрээнд болсон юм.

Үүний дараа Ерөнхийлөгч Н.Энхбаярт А.М. Горькийн нэрэмжит Утга зохиолын дээд сургуулийн ректор Б.Н. Тарасов Хүндэт доктор-ын диплом, өмсгөлийг нь гардуулав. Ёслолын үеэр профессор Б.Н.Тарасов үг хэлэхдээ Монгол Улсын Ерөнхийлөгч Н.Энхбаяр Орос орны тухай ярилцлага бүрдээ өөрийн сургуулиа үргэлж санан дурсаж явдаг гээд орос, англи хэл, дэлхийн утга зохиолын нэвтэрхий мэдлэгтэй төгсөгчтэйдээ бахархаж байна гэлээ. Мөн хоёр талын багш оюутан солилцдог уламжлалтай харилцааг сэргээх, удахгүй болох сургуулийнхаа 75 жилийн ойг тэмдэглэх талаар ярив.

Ерөнхийлөгч Н.Энхбаяр тус сургуулийн оюутнуудад буддын шашны гүн ухаан, ёс заншил, өрнө дорны соёл иргэншлийн онцлог, соёлын мөн чанарын талаар лекц уншив. Лекцийн дараа оюутнууд орчин үеийн жүжиг, Монгол-Оросын соёл урлагийн харилцааны өнөөгийн байдал, монгол яруу найргийн онцлог, оюутан цагийнх дурсамж зэрэг олон сэдвээр асуулт тавьж хариулт авлаа. Нэн ялангуяа Ерөнхийлөгч Н.Энхбаярын оюутан цагийн дурсамж танхимд суугсдын сонирхлыг ихэд татаж, зарим хариултыг нь хүрэлцэн ирсэн багш нар нь тодруулж байв. Ерөнхийлөгч оюутан цагийнхаа тухай ярихдаа 1975-1980 он нь эдийн засгийн хувьд зогсонги үе байсан ч оюутан бидний хувьд ертөнцийн мөн чанар, нийгмийн амьдралын утга учир, шудрага ёс, хүний дотоод ертөнцийн талаарх мэдлэг, оюун ухааны эрэлхийллийн цаг байсан юм гэж онцолсон юм.

Уулзалтын индэрт Ерөнхийлөгч Н.Энхбаярын оюутан ахуйдаа багшийнхаа гэрт авахуулсан зургийг байрлуулсан нь лекц яриаг халуун дотно болгосон ба төгсгөлд нь Монгол Улсын Төрийн Тэргүүн өөрийн бичсэн найман боть номоо сургуульдаа монгол зургийн хамт бэлэглэв.