Уг хурлын нээлтийн ажиллагаанд Монгол Улсын Ерөнхийлөгч Н.Энхбаяр, УИХ-ын дарга Д.Лүндээжанцан, Нийслэлийн Засаг дарга Т.Билэгт нарын төр засгийн төлөөлөгчид оролцож бурхан багшид хүндэтгэл үзүүлсэн бөгөөд энэ үеэр Бакула Ринбүүчийн тухай баримтат киног үзүүлж сонирхууллаа.

Монгол Улсын Ерөнхийлөгч Н.Энхбаяр хуралд оролцогчдод хандаж Та биднийг энд уулзуулж байгаа эрхэм хүмүүн Кушок Бакула нь улс хоорондын найрсаг харилцааг хөгжүүлж, хүмүүн олны энх амгалангийн сайн үйлсэд хичээнгүйлэн зүтгэгч нийгэм, төрийн нэрт зүтгэлтний нэг байсан. Миний бие 90-ээд оны эхэн үед Соёлын сайдын хувиар Ринбүчи багштай хамтран Монгол орны шашин, соёлын түүх дурсгалт сүм дуганыг сэргээх, Мэгжиджанрайсиг шүтээнийг бүтээх, Бурхан багшийн чандрыг Монголд залах, Бурхан багшийн сургаал-ыг орчуулах, Монгол-Энэтхэгийн соёлын төвийг байгуулах зэрэг шашин, соёлын олон үйлсийг бүтээхэд биечлэн оролцохдоо түүнээс үнэт зөвлөгөө туслалцаа авч ажиллаж байсан. Тэрээр энхтайвны элчийн хувьд Монгол орноо анх 1970 онд морилон ирж, Азийн буддистуудын энх тайвны бага хурлын байгууллагыг анхлан байгуулалцаж, монгол түмэнтэй ерөөл учралын бат барилдлагаа тогтоосон билээ. Тэгвэл түүнээс 20 жилийн дараа буюу манай оронд шинэ цагийн үүдийг нээсэн 1990–ээд оны эхээр тэрбээр БНЭУ-аас Монгол Улсад суух Онц бөгөөд Бүрэн эрхт Элчин сайдаар томилогдон ирж, олон жилийн турш үр бүтээлтэй ажилласан юм. Бакула Ринбүчи хэлэхдээ Монголыг Чингис хаан, Бурханы шашин хоёроор нь дэлхий дахин андахгүй билээ гээд Олон оронд Бурханы шашин нь тухайн тэр орны соёлын салшгүй бүрэлдэхүүн хэсэг болсон байдаг. Иймийн учир Бурханы шашныг гээх нь мөн утгаараа өөрийн үндэсний өвөрмөц чанарыг гээнэ гэсэн хэрэг хэмээн сануулан сургамжилсан нь өдгөө ч ач холбогдолтой захиас сургаал хэвээр байна хэмээн хүндэтгэн дурсаж хэлсэн юм.

Мөн энэ үеэр нэгэн чухал үйл явдал болсон нь Нийслэлийн иргэдийн төлөөлөгчдийн хурлын тогтоолоор Бакула Ринбүүчийгийн нэрэмжит гудамж бий болгож байгааг Нийслэлийн Засаг дарга Т.Билэгт уншиж сонордуулсан. Энэхүү хуралд гадаад орны 40 гаруй лам хуврагууд, зочид төлөөлөгчид хүрэлцэн ирж оролцож байгаа аж.