Ямартай ч өнгөрсөн 10, 11-ний шөнө цас оржээ. Зарим суманд метр гаруй цас дарж орхиж. Цас, шуурганд айм­гийн урд талын бүх сум нэр­вэгдсэн байна.

Онгон, Баян­дэлгэр, Наран, Түвшин­ширээ, Дарьганга, Халзан, Эрдэнэ­цагаан, Уулбаян зэрэг сум­ын ард иргэд эд таваарын болон сэтгэл санааны хүнд нөхцөлд байхад сум, аймгийн удирдлагууд сонгуулийн өмнө нутгаасаа УИХ-д суугаа ги­шүүдийн нэрийг хөөдчихнө, чимээгүй байхгүй бол горьгүй хэмээн үнэн бодитой мэдээ­лэл гаргахгүй байна гэж нут­гийн иргэд гом­доллож бай­на. Хүний амь сүйдэж, мал­чид ядуурлын ирмэгт ирсэн гамш­гийн нөх­цөлтэй холбог­дуулан зарла­сан хуралд аймгийн цаг уурын мэргэжилтэн нь Газ­рын гүнд 30 орчим см чийг өгсөн. Энэ жил ногоо арвин, сайхан зун болж, мал сүрэг өснө гэж малчдыг тавла­жээ. Энэ гамш­гийн талаар ОБЕГ-т ч нууцхан хүрээнд ярьж байгаа аж.

Үүл буудсантай холбоо­тойгоор тунадас ороогүй гэж үзвэл Ус, цаг уур орчны шин­жилгээний газар, Онцгой байдлын ерөнхий газраас тус аймагт урьдчилан сэргийлсэн мэ­дээлэл огт өгөөгүй нь ха­чир­халтай. Байгалийн гам­шигт нөхцөлийн улмаас нэг айлаас 400-500 толгой мал гээд айм­гийн хэмжээнд 100 га­руй мянган мал хорогдсон гэ­сэн урьдчилсан дүн гарсан байна. Хятадын хил хүртэл уруудсан малыг хилийнхэн эздэд нь хүлээлгэн өгсөн аж. Мал ч үхэж, хорогдох нь дүүрч гэхэд олон хүн шуур­ганд уруудан алга болж сүйд болохоо шах­сан. Харин айм­гийн онцгой байдлын газ­рын­хан тэднийг эрж олжээ. Ха­рам­салтай нь ээж, охин хоёр осгож нас барсан байдалтай олдсон гэхчилэн нутгийнхан хэлж байна. Тэр бүрлээчид нь Баян­дэлгэр сумын мал­чид аж. Ядахад, малчид ха­вар­жаан­даа буугаад бай­сан бо­ло­хоор цаг агаарын бэрх­шээлийг өөрс­дийн хү­чээр давж чад­аа­гүй гэнэ. Сум­дын За­саг дарга нар малчдыг, су­мын төвд цуглуул­сан бай­сан боло­хоор шуур­ганы өмнөхөн гэртээ харьж амжилгүй хөл хоригд­сон тэд хамаг ма­лаа байга­лийн гам­шигт үйлээ гэж ярьж байна.

Шуурга дэгдэхийн урд өдөр буюу 9-нд Р.Буд гишүүн Түвшинширээ суманд Тэн­гэр­­лэг гэр бүл нэртэй арга хэмжээ зохион байгуулсан юм байна. Гэтэл одоо нэг мет­рийн цаадах хүн хараг­дахгүйд хүрсэн нүдгүй шуур­ганы учруулсан гамшгийн талаар ам ангайхгүй, нутаг орондоо ч үзэгдэхгүй байгаа УИХ-ын ги­шүүн Р.Буд, Сан­гийн сайд Ч.Улаан нарт нут­гийнхан нь гомдолтой байгаа аж. Тэд л уг гамшгийн талаар Засгийн газарт мэдээ хүр­гэж, бидэнд туслах учиртай, үүрэгтэй хэмээн дарга даа­малдаа хэлээд бай­гаа ч хэн ч тоохгүй байгаа гэнэ. Тэгээд аргаа барахдаа хэвлэл мэ­дээлэлд хандаж байна хэ­мээн Сүх­баатар аймгаас бидэнд мэ­дээллээ. Өнөөдөр Сүх­баатар аймагт уул уур­хайн асуудал хүндэрсэн, энд тэндгүй олбор­лолт хийгдсэ­нээс болж малчид ундны ус, малын бэлчээрээр гачигдах болсон гэж мэдээ­лэгд­сээр байтал одоо бүр иргэд нь байгалийн зохиомол гамшигт өртөн амьжиргааны хэдэн малаасаа салжээ.

Б.Хаш