-Их сонин сонсогдлоо. Тэр дундаа хамгийн их оюутантай танай сургууль цаг хэмнэсэн чанартай хоол, хүнсээр оюутнуудаа хангах болсон гэх юм?

-Тийм ээ. Анх 2005 оны наймдугаар сараас манай сургуулийн хоол, хүнсний чиглэлийн багш нар хоёр баг болон төсөл боловсруулж, хэрэгжүүлэхийг зорьсон юм. Сургуулийнхаа цайны газрыг түшиглэн хоол, үйлчилгээний сүлжээ байгуулахаар зорьсон. Ингээд төслөө сургуулийнхаа удирдлагад танилцуулж, тэд ч дэмжсэн. Сургуулийн харьяанд байх учраас ашгийн бус байх нь ойлгомжтой. Гэхдээ ашиг бидний хувьд онц биш. Хамгийн гол нь чанартай хоол, хүнсээр цаг хэмнэсэн байх нь чухал байлаа. Ингээд MUST сүлжээ хоол үйлдвэрлэл үйлчилгээний төвийг байгуулсан юм. Одоохондоо төслийнхөө үр дүнг туршиж байна.

Төслийнхөө хүрээнд яг ямар үйл ажиллагааг явуулж байгаа юм. Цаг хэмнэсэн чанартай хоол хүнс гэдгээ тайлбарлахгүй юу?

-Төсөл ШУТИС-ийн нийт дөрвөн салбар сургууль дээр хэрэгжиж байна. Төслийн хамгийн гол зорилго нь сургуулийнхаа багш, ажилчид, оюутнуудыг чанартай хоол хүнсээр хангах зорилготой юм. Яагаад чанар яриад байна гэхээр гадуур маш их дэлгэрсэн бизнес бол хоолны газар байна. Гэхдээ тэд оюутан, багш нарыг чанартай хоол хүнсээр тэр бүр хангаж чадахгүй байгаа. Тиймээс нэгэнт сургуульд сурч буй оюутнаас төлбөр гэж авч байгаа учраас тэдэнд хүрч ажиллах ажлыг хийх хэрэгтэй юм. Хамгийн гол нь хүүхдүүдийнхээ эрүүл мэндэд анхаарах хэрэгтэй гэж үзээд өөрсдийнхөө хүч бололцоонд тулгуурлахаар болсон юм.

-Чанартай хоол хүнсээр хангах юм бол үнийн хувьд ямар байх вэ?

-Анх төслөө хэдэн жилийн өмнө гаргаж байхдаа яг тэр үеийн ханшаар хоолны үнийг гаргаж байсан. Харин одоо юм их өөрчлөгдөж байна. Тиймээс сургуулийнхаа ойр хавьд байгаа бусад хоолны газрын үнийг судалж үзээд ямар ч байсан 100-300 төгрөгөөр хямд тогтоосон.

-Ажилчид нь оюутнууд юм уу даа?

-Тийм ээ. Манай сургууль хоол хүнсний технологийн ангитай. Тиймээс тус ангийнхаа оюутнуудыг түшиглэн нэг үгээр өөрсдийнхөө хүч бололцоог дайчлан ажиллуулж бай-гаа. Өмнө нь сургуулиуд дадлага хийх газрыг нь олж өгдөг байлаа. Гэтэл зах зээл эхэлснээр оюутнууд маань өөрсдөө дадлага хийх баазаа олдог болсон. Тиймээс мэргэжлийн ангийн оюутнуудаа ашиглан дадлага хийх бааз болгож байгаа. Гадны орны туршлагаас үзэхэд ч тэр сургуулийн¬хаа хоолны газрыг цэвэр оюутнаас бүрдсэн баг ажиллуулдаг юм билээ.

-Гэхдээ оюутнууд бүгд ажиллахгүй юм байгаа биз дээ?

-Оюутнууд хичээлээ хийнгээ үдээс хойш ордог нь үдээс өмнө гэх ч юм уу ээлжээр ажиллах юм. Гэхдээ ингэж ажиллахад хүндрэл их байна. Одоохондоо оюутнуудаа цагаар ээлжээр ажиллуулж байгаа.

-Цалин өгдөг үү?

-Мэдээж өгдөг өө. Цагаар ажиллуулж байгаа оюутнууддаа тав хоногт цалинг нь бодож өгдөг.

-Оюутан бүхэнд хүрч ажиллаж чаддаг уу?

-Эргэн тойронд маань олон хоолны газар байна. Судалгаа хийж байгаа. Гэхдээ оюутан бүхэндээ хүрч ажиллаж чадахгүй нь ойлгомжтой. Юуны өмнө хүчин чадлаа нэмэгдүүлэх хэрэгтэй байна. Манай сургууль нийт 10 мянган оюутантай гээд бодохоор боломжгүй.

-Хоолны хувьд ямар хоолоор үйлчилж байна вэ?

-Оюутнуудынхаа цаг хэмнэсэн чанартай үйлчилгээг нэвтрүүлж байгаа. Цаг хэмнэнэ гэхээр хурдан идэхийг хэлээд байгаа юм биш л дээ. Цаг хэмнэх гэдэг нь хоол олгох цэгүүд нь аль болох их байхыг хэлж байгаа. Давхар бүрт явуулын үйлчилгээ нэвтрүүлж байна. Янз бүрийн хоол хийж байгаа. Гэхдээ хүнсний бүтээгдэхүүнээ шинжилж үздэг. Ширхгийн мантуун бууз, пирошки ч хийдэг. Түрээсийн эзэд чанар, эрүүл ахуйн талд анхаарах бус ашгийн төлөө байдаг гэдгийг ойлгож авсан.

Ж.Цэрэн

дугаар 112/2399/