Энэ үеэр Хятадын талаас нэмэлт галт тэрэг явуулдаг билээ. Ингэснээр долоо хоногийн хоёр өдөрт нь Хятад, Монголын галт тэрэг ээлжлэн Улаанбаатар-Бээжингийн чиглэлд зорчигч тээвэрлэдэг. Тэгэхээр энэ зуны ачаалал бүр ч нэмэгдэнэ. Хятадын тал энэ удаа нэмэлт галт тэргээ явуулах, эсэх нь тодорхойгүй байна. Улаанбаатар төмөр замын кассын эрхлэгч Ч.Энхмаагаас зарим зүйлийг тодрууллаа.

-Энэ зун галт тэргээр зорчих тасалбарын захиалга хэдэн хувьтай байна вэ?

-Бид өнгөрсөн оны арваннэгдүгээр сараас захиалга авч эхэлсэн. Ийм эрт эхэлсэн болохоор удахгүй тасалбар дуусна гэсэн үг. Европууд аяллаа эрт төлөвлөдөг учраас тасалбараа ч бусдаас урьтаж захиалдаг юм.

-Хэрэв Хятадаас нэмэлт галт тэрэг явуулахгүй бол яах вэ?

-Байдал хүндэрнэ. Зуны улиралд долоо хоногт хоёр удаа Бээжин рүү галт тэрэг ээлжилж явахад л галт тэрэг сул суудалгүй байдаг. Энэ жил ачаалал өмнөхөөсөө ч нэмэгдэх нь. Ийм үед нэмэлт галт тэрэг гаргахгүй бол бид эхний ээлжинд зорчигчдоо тасалбар захиалсан өдрөөс нь хамааруулж тээвэрлэхээс аргагүйд хүрнэ.

-Хятадын тал галт тэргээ явуулах, эсэхээ яагаад мэдэгдэхгүй байгаа юм бол?

-Энэ талаар албан ёсны тайлбар хэлэхгүй байгаа. Тэд нэмэлт галт тэрэг явуулахгүй гэж шийдвэл тэр нь олимптой холбоотой байх гэж бид бодож байна.

-Албан ёсны хариуг Хятадаас хэзээ ирүүлэх ёстой вэ?

-Өнгөрсөн дөрөвдүгөөр сарын нэгэн эцсийн хугацаа нь байсан. Гэтэл одоо болтол дуугүй л байгаа.

-Галт тэрэгний хүрэлцээгүй байдал бий болбол жуулчид ч манай улсад ирж чадахгүй болох магадлал бий юу?

-Тийм. Галт тэргээр үйлчлүүлж байгаа жуулчдын урсгал ихэнхдээ ОХУ-аас Улаанбаатарт ирээд Бээжин рүү, эсвэл Бээжингээс Улаанбаатарын чиглэлд байдаг. Гэтэл олимп болох гэж байгаатай холбоотойгоор Хятадын Засгийн газар галт тэрэгний билет худалддаг түрээсийн бүх кассыг мэдэлдээ авчихаад байгаа. Үүнтэй холбоотойгоор Бээжингээс Улаанбаатар руу ирэх хүсэлтэй зарим жуулчин тасалбараа авч чадахгүй байна.

Х.Хулан

Дугаар 120/2880/