Үнэхээр хүүхэд асрах гэдэг зав зайгүй хөдөлмөрлөдөг ажил. Шинэхэн ээжүүд энэ ажилдаа түүртээд хүүхдээ хооллохоо мартах нь цөөнгүй. Хаалганы цаанаас хүүхдээ уйлахыг сонсоод хооллоогүй гэдгээ сая нэг санах нь бий. Гэсэн ч технологи энэ бүгдийг шийдэж эхэлжээ. Нярай хүүхэд асрах тоологч цаг гэсэн бяцхан төхөөрөмж худалдаанд гараад удаагүй байна.

Энэ нь дээр дурдсан ээж аавуудын асуудлаас урган гарсан бүтээл юм. Өөрөөр хэлбэл, шинэхэн аав ээжүүд хүүхэдтэй болонгуутаа өндөр хариуцлагатай тулгарч ихэд цочирддог. Тэгэхээр энэ төхөөрөмж нь үүрэн телефоны хэмжээтэй, уншихад хялбар бяцхан LCD дэлгэцтэй. Үүн дээр нь хооллох, хуурайлах, унтах болон бусад гэсэн дөрвөн янзын тоологч цаг гарна. Хүүхдээ хооллоод хэр их хугацаа өнгөрч байгаа, хэзээнээс хойш унтаж байгаа билээ, хуурайлах болсон болов уу, хэдэн цагийн дараа эмээ уух вэ гээд л түмэн асуулт толгойд эргэлддэг.

Тэгвэл энэ тоологч цаг нь бүгдийг тоолох юм. Хүүхдээ хооллож дуусангуутаа тухайн товчлуур дээр дармагц энэ цаг 0-ээс явж эхэлнэ. Энэ цаг тодорхой хязгаарт хүрмэгц гэрэл асч, сэрүүлэг дуугарч танд дараагийн хооллолтыг сануулна. Харин тэр хязгаар буюу хэдэн цаг тутамд хооллох ёстойг нь урьдчилан оруулсан байна. 25 орчим доллараар үнэлэгдэн интернэтээр борлуулагдаж байгаа энэ авсаархан төхөөрөмжийн дэлгэцийг хүссэн зургаараа чимж болно. Бас ардаа жижигхэн хавчаартай тул бүс юм уу аль нэг газраа зүүгээд байнга авч явах боломжтой юм.

Дугаар 120/2880/