энэ сарын 9-14-ний өдрүүдэд хууль бус ан агнууртай тэмцэх ажлын хүрээнд Төв, Сэлэнгэ аймаг, Тэрэлж, Багануур, Нийслэлийн ногоон бүсийн Хандгайт, Их, Бага баян, гүнт, Толгойтын баруун салааны чиглэлд хяналт шалгалт хийжээ. Энэ үеэр хулгайн ан болон хууль бус нэлээд хэдэн үйлдэлтэй таарсан байна. Энэ талаар Нийслэлийн мэргэжлийн хяналтын газрын Байгаль орчны хяналтын улсын байцаагч Ч.Бадамаас тодрууллаа.

-Дулааны улирал эхлэхээр хууль бус ан агнуур ихсэх хандлагатай байдаг. Энэ үеэр Ан агнуур болон Ойн хуулийн дагуу зохих газруудад хяналт шалгалт хийжээ. Энэ талаар?

-Энэ удаагийн шалгалтаар ахуйн зориулалтаар загас барих, бор гөрөөс, ус намгийн шувуу агнах явдлаас урьдчилан сэргийлэх, зөрчил гаргахыг завдсан болон зөрчил гаргасан гэм буруутай этгээдийг илрүүлэх нь энэ хяналт шалгалтын зорилго байсан. Шалгалт хийх явцад ан агнуурын хууль, ойн хуулийг зөрчсөн үйлдлүүд бас илэрсэн.

-Хотын ойролцоохь газар нутгуудад хууль бус ан агнуурын шалгалт хийх явцад ямар ан хийх гэсэн иргэдтэй их таарч байв?

-Манай хяналт шалгалтын хэсэг амралтын өдөр өглөө есөн цагаас оройн 18 цаг хүртэл Багануурын чиглэлд хяналт шалгалт хийсэн. Тэгэхэд дандаа жийп машин хөлөглөсөн хүмүүс л хууль зөрчиж, бор гөрөөс агнах зорилготой явж байх юм. Энэ хооронд гэхэд л бидэнтэй найман жийп машин таарсан. Бас дээр нь дандаа том том ангийн буу авч, яваа мөртлөө зарим нь буу зөвшөөрлийн бичиггүй байх жишээтэй. Үүнээс үзэхэд баян чинээлэг хүмүүс бор гөрөөсийг зугаа цэнгэл хөөцөлдөж, таашаал авах үүднээс хороож байгаа нь харагдаж байгаа юм.

-Үүнээс гадна Сэлэнгэ аймгийн нутаг дэвсгэрт хууль бус загасчлал их байдаг гэсэн?

-Сэлэнгэ аймгийн Ерөө сумын Ерөө голын эх Хонин нугад гэнэтийн шалгалт хийхэд загасчилж байсан хэд хэдэн хүмүүстэй таарсан. Тэдэнд зохих ёсны торгууль ногдуулж, авч явсан ангийн бууны хэрэгсэл, загасны уурга, дэгээ, гэрэлтүүлэг зэргийг хурааж тухайн газрын байцаагчдад нь хүлээлгэн өгсөн.

-Ойн хууль зөрчсөн ямар үйлдлүүдтэй учирсан бэ?

-Хууль бусаар мод бэлтгэчихээд түүнийгээ бас зөвшөөрөлгүй зүсч бэлтгэдэг газрыг Төв аймгийн Борнуурт явж байхдаа илрүүлсэн. Тэндхийн иргэн Банзрагч үүнийг үйлддэг байсан байгаа юм. Үүнээс гадна Мандал сумын Түнхэл тосгон орох замд худалдаж явсан гэх ямар ч бичиг баримтгүй блок модыг 64-07 УБХ дугаартай Зил-130 машин тээвэрлэж явсныг саатуулан шалгаад байна.

-Энэ өдрүүдэд нийт хэчнээн хүнд ямар хэмжээний торгууль ногдуулсан бэ?

-Энэ шалгалтын явцад 45 машинтай, 123 иргэн хамрагдсан. Үүнээс 18 зөрчил илрүүлсэн байгаа. Хууль бусаар ан хийх зорилгоор авч явсан ангийн буу нэг ширхгийг түр, бичиг баримгүй буу хоёр бууг бүрмөсөн улсын орлого болгосон. Хамгийн ноцтой нь манай оронд нэн ховор амьтдын тоонд ордог халиун бугын хоёр чив засаа худалдаж авсан гэх таван иргэнд таван сая 535 мянган төгрөгийн торгууль нөхөн олговрыг ногдуулсан. Үүнээс гадна 400 гаруй шинэхэн балк, нэг машин 100 ширхэг шургааг зэргийг саатуулан зургаан сая төгрөгийн мод, модон бүтээгдэхүүнийг улсын өмч болгосон.

Г.Уянга

дугаар 112/2399/