Тэгвэл өнөөдөр УИХ-ын дарга Д.Лүндээжанцан, Засгийн газрын гишүүн Гадаад хэргийн сайд С.Оюун нар Хятадын элчин сайдын яаманд очиж эмгэнэлийн бичигт гарын үсэг зурлаа.

Тус эмгэнэлийн бичигт ’’ БНХАУ-ын Сычуань мужид газар хөдлөж, олон хүний амь нас эрсдэж, олон арван хүн орон гэргүй болж, эд материалын хохирол учирсан явдалд Монгол улсын нийт ард түмний өмнөөс гүн эмгэнэл илэрхийлье’’ гэжээ.

Хариуд нь элчин сайд Юй Хоняао гамшгийн газар хийгдэж байгаа аврах болон сэргээн босголтын ажлын талаар танилцуулж, хүний амь нас аврах ажил тасралтгүй үргэлжилж байгааг дурьдаад Монгол улсын төр засаг, ард түмэн талархаж байгаагаа илэрхийллээ.

Цаашид Монгол улсаас, гамшигт өртсөн муж болон хятадын ард иргэдэд нь ямар тусламж үзүүлэх талаар УИХ-ын даргаас тодрууллаа.

үideo1

Ямартай ч Засгийн газраас өөрийн бололцооны хирээр мөнгөн тусламж үзүүлэхээр шийдвэрлэсэн байгаа юм байна. Мөн сүүлийн үед манай ард иргэдээс Хятадын элчин сайдын газарт ирж тусламж дэмжлэг үзүүлж, хандив өгч байгаад талархаж байгаагаа дамжуулж өгөхийг хүсэж байлаа.

УИХ-ын дарга цааш нь ямар ч тусламж гэдэг багаддаггүйг сануулаад ТББ-ууд, аж ахуйн нэгж, үйлдвэр компаниуд, ард иргэд, анги хамт олноороо ч гэсэн гамшигт нэрвэгдэж амь насаа алдагсдын ар гэр мөн орон гэргүй болсон ард түмэнд тусламж үзүүлж, хөдөлгөөн аян өрнүүлэхийг уриаллаа.

Энэхүү аймшигт газар хөдлөлтөнд одоогийн байдлаар 34000 хүн амь насаа алдсан ба энэ тоо цаашид 50000-д хүрнэ хэмээн мэдээлсэн байна.

Б.Баяр

Ж.Дарханжаргал