Хүнсэндээ аль болох жимс, шинэ ногоо, жимсний шүүс оруулж, өдрийн хоолны дэглэм сайн сахихад анхаарах хэрэгтэй. Хөхүүл эх өдөртөө бага багаар олон удаа хооллох нь зохистой. Шингэц сайтай хурц биш хоол, хүнсний бүтээгдэхүүн хэрэглэх нь чухал. Шарсан хуурсан хоолноос зайлсхийж, чанаж, жигнэж идэхийн хичээгээрэй.

Хоногт дунджаар 180-200 грамм мах, 50 грамм цөцгийн тос, 1 өндөг, 800 грамм хүнсний ногоо, жимс, 400-500 грамм хивэгний болон бор гурилын талх хүнсэндээ хэрэглэвэл хөхүүл эхийн хооллолт зохистой байна гэж үздэг. Хөхүүл эх ясны эдийн, ялангуяа шүдний кальцийн дутагдалд орж, үс, хумс хэврэг, хугарамтгай болох зэрэг таагүй үр дагаварт хүрэх нь бий. Иймд кальцаар баялаг бяслаг/монгол /, загас, аарц, бууцай зэрэг бүтээгдэхүүнийг тогмтол хэрэглэж байх шаардлагатай.

Сүү болон сүүн бүтээгдэхүүнийг хэт ихээр /хоногт 0,5 литрээс дээш/ хэрэглэвэл хүүхдийг үхрийн сүүний уурагт харшилтай болгож мэднэ гэдэг ч энэ нь гол төлөв европ зүгийнхэнд ажиглагддаг зүйл.

ЭМ, ЭМИЙН БЭЛДМЭЛ

Хүүхдээ хөхөөр хооллох үед хэрэглэдэг эм, эмийн бэлдмэлийн талаар зарим зүйлийг онцгой анхаарах хэрэгтэй. Барбитурат, бромид, йод, зэсийн агуулгатай эм, антибиотикууд, бамбайн булчирхайн шүүрлийн эсрэг бэлдмэлүүд, хавдрын эсрэг эм зэрэг хэрэглэвэл эхийн сүүгээр дамжин хүүхдийн бие махбодид сөрөг нөлөө үзүүлж болзошгүй гэдгийг мартаж болохгүй. Иймд эм, бэлдмэл хэрэглэхийн өмнө эмчээс заавал зөвлөгөө авч, зайлшгүй уух шаардлагатай үед түр хугацаагаар хүүхдээ угжаар хоолло. Энэ үедээ хөхөө сааж байх шаардлагатай. Улмаар эмчилгээ дуусмагц эргээд хөхөөр хооллож болно.

ХӨХ СҮҮГҮЙ БОЛОХ

Төрсний дараа хөх сүүгүй байхыг анагаах ухаанд гипогалактик гэдэг. Энэ нь гол төлөв амьдралын таагүй нөхцөл байдалтай холбоотой байдаг ч хэвийн нөхцөлд ч үүсэх нь цөөнгүй. Сүү ялгаралт буюу лактацийг сайжруулах олон арга байдаг ч тухайн хүний биеийн онцлогоос хамаараад үйлчилгээ нь янз бүр. Тэгэхээр бүх эхчүүдэд тохирох шилдэг арга гэж хэзээ ч байдаггүй гэдгийг ойлгох хэрэгтэй.

Янз бүрийн өвс ханд, цайнууд сайн байдаг. Мөн хушигны сүү, ногоон цай өндөр үр нөлөөтэй . Хушигны сүү бэлдэх тун энгийн бөгөөд нунтаглаж жижиглэсэн хушиг дээр сүү хийж хэсэг хугацаанд хандлаад хөхүүлэхээсээ 20 Минутын өмнө ууна.

Мөн нойр маш чухал үүрэгтэй болохоор хоногт 8-9 цагаас багагүй унтах, биеийн хүчний хүнд ажил хийхгүй байх, цэвэр агаарт салхилж байх хэрэгтэй. Үүнээс гадна хөхийг кварцын гэрлээр шарах, хэт өндөр авианы туяагаар өдөөх, А, Е витамин, никотин бол глютаминий хүчил, шар айрагны хуурай дрож уух зэрэг олон эмчилгээ байдаг. Гэхдээ тухай бүрт өрхийн эмч, хүүхдийн эмчтэйгээ зөвлөж байх хэрэгтэй.

Дугаар 99/418/