Ринбүүчиг Монголд томилогдон ирснээс хэдхэн сарын дараа манай улс эрх чөлөөтэй, ардчилсан улс болж байлаа. Тэрээр Монголын бүх өнцөг буланд саатан морилж, хөдөөгийн ардтай олон өдрийг хамтдаа өнгөрүүлж, манай улсад өрнөж байсан түүхэн шинэчлэл өөрчлөлтөд идэвхтэй оролцож байсан юм. Түүний Энэтхэг-Монгол улсын харилцаа болон Монголд буддын шашныг сэргээхэд оруулсан хувь нэмрийг нь үнэлж, Монгол Улсын Ерөнхийлөгч Алтан гадас одонгоор хүртэл шагнаж байсан. Бакула Ринбүүчи нь манай улстай маш их ойр дотно холбоотой байсан болохоор түүнийг Элчин багш хэмээн хүндэтгэдэг.

Өчигдөр түүний мэндэлсэн ойн өдөр бурхан багшийн их дүйчин өдөртэй давхцаж байв. Тэрээр Монголд амьдрах хугацаандаа 21 аймгаар аялан сүм хийдийг сэргээх үйлеэд гар бие оролцож байжээ. Түүнийг бурхан болсны дараа чандраас нь Монголд залж авчран суварга босгосон билээ. Өчигдөр энэ хүний дурсгалыг мөнхжүүлэх ажлыг амжилттай зохион байгуулж, түүний тухай кино, дуу зэргийг нийтэд сонирхуулсан юм.

Мөн Гандантэгчинлэн хийдийн залуу хуваргууд болон Шашны сургуулийн төлөөллүүд өчигдөр Бакулагийн сүүдэр тохиосны өдөрт зориулан ариун сэтгэл, буяны үйлийг бүтээсэн юм. Тэд Туул голын сав газрыг цэвэрлэх, танин мэдэхүйн чиглэлээр янз бүрийн арга хэмжээг зохион байгуулсан юм.

А.Анужин

Дугаар 99/418/