Нийслэлийн Засаг дарга бөгөөд Улаанбаатар хотын захирагч Т.Билэгт ёслолын ажиллагааг нээж хэлэхдээ Монгол Улсын Ерөнхийлөгч Н.Энхбаяр Очирвани шүтээнийг бүтээн залах тухай 129 тоот зарлигаа 2007 оны 5-р сарын 31-нд гаргаснаар шүтээнийг бүтээн, залж байна гэв.

Монгол газар орон, хүн зоны цог хийморь, заяа буяныг ивээн даах учрал ерөөлт Нууцын эзэн очир баригч буюу Богд Очирвани шүтээнийг шинээр бүтээн залах нь үндэсний ухамсар, сэтгэлгээ, шашин соёл, түүхэн уламжлалаа сэргээн хөгжүүлэх, иргэд олны сэтгэл зүтгэл, итгэл бишрэл, эрмэлзэл тэмүүллийн их хүчийг тэтгэн өдөөх бэлгэдэл утгатай гэж үзэж Төрийн тэргүүн шүтээн бүтээх зарлиг гаргасан байна.

Монголын Бурхан шашинтны төв Гандантэгчинлэн хийдийн тэргүүн, их хамба лам, гавж Д.Чойжамц сайн сайхны ерөөл дэвшүүлж, сүсэгтэн олонд зориулан ном уншив.

Дараа нь аймаг, нийслэлийн тугийг хүндэт харуулын цэргүүд шүтээний хоёр талаар заллаа. Мөн морин хуурын тэмцээний тэргүүн байрын шагналт П.Тэмүүжин тэргүүтэй морин хуурчид хуур хөглөж, уртын дуучид ая дуугаа өргөн, бүжигчид цамын бүжиг бүжлээ.

Хамба лам Д.Чойжамц, Дашчойлин хийдийн тэргүүн хамба Ч.Дамбажав тэргүүтэй лам хуврагууд Их шүтээнд Мандал, равнай өргөж, тахилга үйлдэв. Дараа нь Монгол Улсын Ерөнхийлөгч Н.Энхбаяр Очирвани шүтээний хөргийг аймаг, орон нутгийн төлөөлөгчид болон шүтээн бүтээхэд хандив өргөсөн байгууллага, хүмүүст гардуулсан юм.

Энэхүү ёслол хүндэтгэлийн арга хэмжээнд УИХ-ын дарга Д.Лүндээжанцан, УИХ-ын гишүүд, Хөдөлмөрийн баатар их аварга Д.Баянмөнх, Б.Мөнхбат, Хөдөлмөрийн баатар, ардын жүжигчин Д.Лувсаншарав, Г.Хайдав, Ж.Цогзолмаа, Төрийн хошой шагналт, ардын жүжигчин хөгжмийн зохиолч Н.Жанцанноров нарын зэрэг алдар суутнууд, гадаадын зочид, орон нутгийн төлөөлөл, шүтээнийг урласан Монгол Улсын Соёлын гавъяаь зүтгэлтэн бурханч лам Г.Пүрэвбат, уран хатгамалчид оролцож, иргэд санал сэтгэгдлээ илэрхийллээ.