-Сүүлийн үед хогийн төвлөрсөн цэгийн орчинг тохижуулах, цэгцлэх талаар багагүй ажил хийж байгаа гэж сонслоо?

-Манай хогийн цэгт сүүлийн дөчин жил ямар нэгэн цэгцлэх, дарж устгах ажил хийгдээгүй өнөөдрийг хүртэл явж иржээ. 26.5 га талбайг хамарсан хогийн цэг байдаг. Аймгийн ЗДТГ, Байгаль орчны алба хамтран хөрөнгийн асуудлыг нь шийдэж хогийн цэгээ цэгцлэх ажил эхлээд cap шахмын ажил ундраад байна.Энд 300 орчим сая төгрөг зарцуулагдана. Манай ажилчид хоёр ээлжээр ажиллаж олон жилийн хур хогийг дарах, 20 гаруй га талбайн тарж бутарсан хогийг цэвэрлэх ажлыг хийж байна. Мөн хашаажуулах, төвлөрсөн хогийн цэгийн талбайг багасган 6 га талбайд багтаахаар ажиллаж байгаа юм.

-Хогийн цэгийн талбайг багасгахын тулд ямар ажил хийх ёстой вэ?

-Өнөөдрийн байдлаар 20 гаруй га талбайг цэвэрлэж шинээр хөрс суулган 10 гаруй мянган мод бут суулгаад байна. Хогийн зориулалттай талбайд ахуйн, үйлдвэрлэлийн, дахин ашиглаж болох, бүрэн устгах тусгай цэгүүд байгуулан тэндээ хогоо асгана. Мөн хог тарж бутрах, салхинд хийсэхээс хамгаалж таван давхар хашаатай болгосон. Дээр нь таван давхар ногоон хэрэм босно. Энэ хашааг давж хог хийсэхгүй, хашаанаас гадна хог асгахгүй бүгд хамжааргатай болно гэсэн үг дээ.

-Ногоон хэрэм босгоно гэдэг их сонин сонсогдож байна?

-Тиймээ. Манай ногоон байгууламжийнхан одоогоор 17 мянган агч, хайлаас модыг 4-5 үеэр тариад байна. Хуучин олон улсын зэрэглэлтэй замын дагуу хог хийсч байдаг байлаа харин одоо тусгай зориулалттай талбайд хогоо асгана. Хэрэв Байгаль Орчны Яамнаас хэрэгжүүлэх төслөөр гялгар уут боловсруулах жижиг оврын үйлдвэр ороод ирвэл тэндээ хогоо боловсруулна.

-Хог түүж амьдралаа залгуулж байгаа олон хүн тэнд байгаа. Хэл амаа хэрхэн ололцож байна вэ?

-Өнөөдөр хогийн цэг дээр 100 гаруй хүн амьдарч байна. Бид эхний ээлжинд тэдэнтэй уулзаж нэгдсэн зохион байгуулалтад оруулахаар ярьсан юм бий. Гэрээ хийнэ. Нэг хэсэг нь хуванцар түүдэг, нөгөө нь шил, яс гэх мэтээр төрөлжүүлэн түүх, түүнийгээ тушаах газрыг нь олж өгөх зэргээр тусална. Тэдний түүсэн олсоныг бид булаацалдахгүй харин тэсэрч дэлбэрэх зүйлд өртөх вий, халдварт өвчинд нэрвэгдэх вий гэдэгт хяналт тавина. Өнөөдөр ашиглаж болохгүй үйлдвэрийн хортой хаягдал байна шүү дээ.Тийшээ тэд яваад л ордог. Ер нь цаашдаа зохион байгуултад орох нь зүйтэй гэсэн бодлого барина

-Дархан хотын ногоон байгууламж, тохижилтын талаар хэдэн зүйл асууя. Энэ жил манай аймгийн ногоон байгууламж хэрхэн хүрээгээ тэлж байна вэ?

-Дархан хотод 10 гаруй мянган мод бут суулгаад байна. Морин хуур цогцолборын ойр орчмын ногоон байгууламжийг нөхөн сэргээж байна. Төв гудамжууд болон Миний Монгол цэцэрлэгт хүрээлэнд нөхөн тарилтыг хийж байгаа. Бид 16 давхрын өмнөх талбай болон цэцэрлэгт хүрээлэндээ 1000 гаруй цэцгийн мандал байгуулна.

-Танай байгууллага Миний Монгол цэцэрлэгт хурээлэнг хариуцан ажилладаг. Энэ жилийн хүүхдийн баярт хэрхэн бэлтгэж байна. Хүүхэд багачууд маань баяраараа хэрхэн цэнгэх бол?

– Бид боломжийн хэрээр бэлтгэж байна. Манай паркт байгаа хөдөлгөөнт тоглоомууд олон жил болж эдэлгээний хугацаа дууссан, аюулгүйн нөхцөл хангаж чадахгүй болсон учраас Мэргэжлийн хяналтын газраас хаачихсан. Харин бидний өөрсдийн бүтээн байгуулсан тоглоомууд байгаа шүү дээ.Манай аж ахуйн нэгж байгууллагууд өөрсдийнхөө хийсэн бүтээснээ нэмэх, сэргээн засах ажлаа хийж эхлээд байна. Тухайлбал Төмөрлөгийнхөн, Ус сувгийнхан, Алтансагсынхан мод тарих тоглоом нэмэх зэргээр ажиллаж байна. Энд Эрэл цемент, Төмөр зам гэх мэт байгууллагуудыг бас онцлож хэлмээр байна, Тэд тохижилт үйлчилгээг сайн хийж энэ ажлыг уламжлал болгоод байгаад баяртай байгаа. Манай хөгжлийн бэрхшээлтэй иргэд өөрсдийн санаачлагаар 1000 мод тарьсан гээд ярих юм их бий.

-Хот тохижуулахынхан ажил ихтэй, цаг наргүй ажилладаг. Цалин мөнгө нь нэмэгдсэн үү?

-Өнөөдөр манайх 200 шахам ажилтантай байгаа. Тэд маань үнэхээр ажилдаа үнэнч хүмүүс. Өнөөдөр хамгийн бага нь 140-150 мянган төгрөгийн цалин, дээр нь хоол унааны мөнгө олгогдож байгаа. Ажлын бүтээмж, нөхцөл ч харьцангуй дээшилсэн. Аймгийн ЗДТГ-аас хогны хоёр машиныг Япон улсаас оруулж ирсэн, БОЯ-наас нэг трактор олгосон. Мөн гэрэл сольдог өргөгч машин авч өгснөөр одоо Дархан хотод шөнөдөө 3000 гаруй гэрэл асаж хот өнгөжиж байна.

Г.Буян

Дугаар 98/165/