Тус аймгийн нутагт орших Хөшөөтийн уурхай нь 4.4 тэрбум тонн нүүрсний нөөцтэй, нүүрс нь 7411 кл клор илчлэгтэй, нэг ёсондоо Таван толгойн нүүрснээс илчлэгийнхээ хувьд тэнцүү гэж Хонк-Конгийн бирж дээр бүүр ил цагаан зарласан билээ. Тийм учраас мөнгөтэй, шуналтай хүмүүсийн хараанд аль хэдийн өртсөн. Гэхдээ бүр гадаадын луйварчдын хараанд. Үүнийг нь эсэргүүцэн Ховд аймгийн залуус нутаг усныхаа төлөө тэмцэж байхад засаг дарга нар болон эрхтэн дархтанууд нь төсвийн мөнгөөр Улаанбаатар хотод хэвлэлийн бага хурал зарлан хуралдуулж байсан билээ.

Ховдын залуусыг нутаг усаа хамгаалан босоход хөшөөтийн уурхайн нууц ноёдууд нь нэлээдгүй сандралдсаныг та бүхэн санаж байгаа байх. Цаг хугацаа өнгөрсөөр хөшөөтийн уурхай зутарсаар л… Эрх мэдэлтний халаас зузаарсаар л… Гэвч худал хуурмагаар дүүрсэн энэ нийгэмд шударга хүмүүс байна аа. Хөшөөтийн нүүрсний уурхайн талаар УИХ-ын 2008 оны дөрвөдүгээр сарын 25-ны өдрийн хуралдаанаар УИХ-ын гишүүдийн асуултад Засгийн газрын гишүүд ийнхүү хариулжээ.

Ховд аймгийн Цэцэг, Дарви сумын нутагт орших Хөшөөтийн нүүрсний уурхайн лиценз болон бусад үйл ажиллагааны талаарх асуулгад. Үйлдвэр худалдааны сайд Х.Наранхүү Монгол Улсын Төсвийн зардлаар Хөшөөтийн нүүрсний уурхайд 1967 онд эрэл хайгуул, 1972-1973 онд урьдчилсан хайгуул, 1978,1979 онд нарийвчилсан хайгуулын ажил хийгдэж, нүүрсний 24.3 сая тн нөөц тогтоосон байна. Ордыг 1971 оноос орон нутгийн хэрэгцээнд ашиглаж 1.5 сая тонн нүүрс олборлосон байгаа юм. Хөшөөтийн ордын талбайд 1990 оноос хойш арваад аж ахуйн нэгж, хувь хүмүүс ашиглалтын лицензийг эзэмшиж байсан. Өнөөгийн байдлаар Мон-Энко ХХК Ховд аймагт нийт 13 тусгай зөвшөөрөл эзэмшдэгээс Хөшөөтөд долоо, Дарвид гурав, Нийт найман ашиглалтын тусгай зөвшөөрөл бүхий 2600 гектор, хайгуулын 63300 гаруй гектор талбайд геологи хайгуулын үйл ажиллагаа явуулж байна. 2007 оны хийсэн нөөцийн хайгуулаар 306.1 тн нүүрс байгаа нь илэрсэн. Үүнээс 180 гаруй сая тн нь коксжсон нүүрсний баялаг байх магадлалтай гэсэн тооцоо гарсан байна. Ашиглалтын өмнөх хайгуулын ажилд 2007 оны эцсийн байдлаар нийтдээ 9.4 тэрбум төгрөг зарцуулсан гэсэн тооцоо мөн гарчээ гэсэн юм.

Харин ГЕГ-ын дарга Д.Цэвээнжав Мон Энко компани өнгөрсөн оны долдугаар сарын 21-ны Ярантын боомтоор оруулж ирсэн гаалийн барааны мэдүүлгээ өгсөн. Мэдүүлгийн дагуу барааг нь шалгахад зөрүүтэй бодис гарч ирэхэд нь гаалийнхан цагдаа, тагнуулын байгууллагад мэдэгдэж, дээж авсан байдаг. Гаалийн байгууллагынхан цагдаад эд мөрийн баримт болох 74.2 тн 12 төрлийн бодисыг шилжүүлж өгсөн. Тус компани нь химийн бодис оруулж ирэх ёсгүй боомтоор нэвтрүүлэхийг завдсан, мөн гаалийн мэдүүлэгтээ 74 тн химийн бодисын талаар огт дурдаагүй зэргээр манай улсын хууль дүрмийг зөрчсөн. Шүүхийн шийдвэр гарсны дараа уг химийн бодисыг худалдах эсвэл улсын орлого болгох эсэх нь шийдэгдэнэ. Түүнээс бус хууль зөрчсөн байхад Хятадын талд буцааж химийн бодисыг өгөхгүй гэж хариулжээ. Үнэн худлын хооронд дөрвөн хуруу зай байдаг гэж ард түмэн ярьдаг. Монголын ард түмэн хэзээ өмчийнхөө эзэн болох вэ!!.

Дугаар 18/28/