Гэвч өнөөдөр олох хэдхэн төгрөгийн ашиг хонжооны араас улайрагчид байгаль орчныг сүйтгэхээ юман чинээ боддоггүй нь харамсалтай. Зөвхөн нэг удаагийн хяналт шалгалтаар илэрч буй дараахь ноцтой зөрчлүүд үүнийг нотолно. Шалгалтын явцад 45 машинтай 123 иргэнийг шалгаж, 18 зөрчил илрүүлсэн байгаа.

Халиун бугын чив, засаа авч явсан хүмүүст эрүү үүсгэжээ

Улсын болон нийслэлийн мэргэжлийн хяналтын газар, ЦЕГ-ын Хэрэг бүртгэх газрын ажилтнууд хууль бус агнуурыг илрүүлэх зорилгоор шалгалт хийжээ. Эл шалгалтад Төв аймгийн Батсүмбэр, Борнуур, Баяндэлгэр, Мөнгөнморьт сумын нутаг Хэрлэн голын ай сав дагуу, Сэлэнгэ аймгийн Хүдэр, Мандал сумын Хонин нуга, Тэрэлж, Багануур, нийслэлийн ногоон бүсийн Хандгайт, Их, Бага баян, Гүнтийг хамруулсан байна. Хяналтын байцаагчид, цагдаагийнхан хамгийн түрүүнд Сэлэнгэ аймгийн Ерөө сумын Ерөө голын эх Хонин нугад загасчилж байсан 5898УБР дугаартай Мицубиши маркийн машинтай хүмүүстэй таарчээ. Хууль зөрчин загас агнагчид нийслэлийн харьяат Амарбат, Ганбаатар, Зоригтбаатар нар байсан бөгөөд тэдний уургыг хурааж, торгох арга хэмжээ авсан байна. Мөн ТОЗ-8 маркийн буу авч явсныг түр хураан авчээ. Шалгалтынхантай таарсан дараагийн хулгайн загасчид болох Мандах, Борхүү нар 9432 УБН дугаартай Аксент маркийн машинтай явсан байна. Тэднийг илрүүлэн шалгаж, гурван ширхэг уурга хурааж торгожээ.

Тэрчлэн 4416 УБС дугаартай Мицубиши пажеро машиныг зогсоож шалгахад, М.Батбилэг О.Буянбатын хамт урт бууны хоёр ширхэг гэр, гэрэлтүүлэх хэрэгсэлтэй явж байсан аж. Иймээс тэдний буу авч явсан эсэхийг нягтлуулахаар Хан Хэнтийн дархан цаазат газрын улсын байцаагчдад даалгасан байна. Иргэн О.Мөнхбаярын машинаас ТОЗ-8 маркийн буу илрүүлсэн бөгөөд уг буу нь өмчлөх эрхийн гэрчилгээгүй, серийн дугаар нь баларсан байсан нь Галт зэвсгийн тухай хууль зөрчсөн үйлдэл учраас хураан авч, шалгаж эхэлжээ. Энэ мэтчилэн хууль бусаар ангийн хэрэгсэл авч явсан хүмүүсийг илрүүлж, гурван буу, 11 загасны уурга, хоёр гэрэлтүүлэх хэрэгсэл зэргийг хураан авсан байна. Хамгийн ноцтой нь нэн ховор амьтан болох халиун бугын хоёр чив, засаа авч явсан таван иргэнд Амьтны аймгийн тухай, Ан агнуурын тухай, Эрүүгийн хуулийн дагуу таван сая 535 мянган төгрөгийн нөхөн төлбөр, торгууль ногдуулан, эрүүгийн хэрэг үүсгэн шалгаж эхэлжээ. Тэд чив, засааг бусдаас худалдан авсан гэж мэдүүлж байгаа аж.

Шөнө ажилладаг хөрөө рам илрүүлжээ

Ой модны хулгайчид ч шалгалтынхантай цөөнгүй таарчээ. Тухайлбал, нийслэлийн Сонгинохайрхан дүүргийн нутаг авто техникийн шалган бүртгэх 22-ын товчоо хүрэх замд балк ачсан 6768 УББ улсын дугаартай ЗИЛ 4505 маркийн машиныг шалгахад жолооч нь бичиг баримтгүй, хугацаа хэтэрсэн, засвартай эрхийн бичигтэй, шалган нэвтрүүлэх товчоонд бүртгүүлээгүй зөрчилтэй байсан аж. Иймээс машиныг журмын хашаанд саатуулж, балкны экологи, эдийн засгийн үнэлгээг тогтоон нөхөн төлбөр ногдуулах, хурааж улсын орлого болгохоор шийдвэрлэжээ. Мөн Хэрэг бүртгэх газарт хэргийг шилжүүлсэн байна. Тэрчлэн Сэлэнгэ аймгийн Мандал сумын Түнхэл тосгон орох замд иргэн Энхээгийн худалдаж авсан гэх балк тээвэрлэж явсан 6407 УБХ дугаартай ЗИЛ 130 машиныг шалгахад гарал үүслийн гэрчилгээгүй, эрхийн бичиггүй байсан аж. Ийм зөрчилтэй 7337 УББ дугаартай ЗИЛ130 машиныг мөн саатуулжээ.

Энэ машинд иргэн Алтанбаатар гэгч шургааг тээвэрлэж явсан байна. Хяналтын байцаагч, цагдаагийнхан Төв аймгийн Борнуур суманд шөнийн 01.00 цагт хулгайгаар бэлтгэсэн мод зүсч, борлуулдаг зөвшөөрөлгүй хөрөө рам ажиллуулж байсан иргэн Базаррагчаагийн хууль бус үйлдлийг ч илрүүлжээ. Ийн нэг удаагийн шалгалтаар зөвшөөрөлгүй, гарал үүслийн гэрчилгээгүй, гэрчилгээ нь засварласан 400 гаруй шинэсэн балк, нэг машин, 100 ширхэг шургааг хураан авч, нийт зургаан сая төгрөгийн мод, модон материалыг улсын орлого болгосон байна.