-Та хүүгээ баривчлагдсаныг хэзээ мэдэв?

-Долдугаар сарын 2-нд мэдсэн. Хүү маань би 111-т саатуулагдчихлаа. Ээжээ намайг ирж аваач гэж утсаар ярьсан. Тэгээд би уулзах гэж очоод чадаагүй. Тэнд гурав хонуулаад Баянзүрх дүүр¬гийн цагдаагийн хэлтэс рүү шилжүүлсэн. Нэг мэдсэн чинь Ганц худагт хорьсон байсан. Өнөөдрийг болтол хүүтэйгээ нэг ч удаа уулзаж чадаагүй л байна.

-Байцаагчтай нь уулзсан уу?

-Уулзсан. Хүү чинь бичиг баримтгүй болохоор уулзуулах боломжгүй. Бичиг баримтыг нь аваад ир. Тэгээд уулзуулья гэсэн. Иргэний бүртгэл, дүүрэг, хороогоор өдөр болгон шахуу орж арай гэж нэг юм тодорхойлолт, бичиг баримтыг нь аваад очлоо. Уулзуулсангүй.

-Яагаад?

-Байсхийгээд л байцаагч нь солигдчих юм. Таньж мэдэхгүй болохоор олдохгүй. Хэрэг нь Үнэнбаяр гэдэг байцаагч дээр байгаа гэсэн. Түүнтэй арай гэж нэг юм уулзсан. Хүүтэйгээ уулзах, суллуулчих юмсан гэж чадах бүхнээ л хийж байна. Аргаа бараад хүний эрхийн хороонд өргөдөл хүртэл гаргалаа.

-Ямар хэрэг хийсэн гэж хүүг тань баривчилсан гэнэ. Байцаагч нь юу гэж байна?

-МАХН-ын байр руу чулуу шидсэн. Цонх хагалсан гэж л хэлсэн. Төрсөн оноо буруу хэлж буруу мэдүүлэг өгсөн гэж байсан. Хүүг маань Баттулга гэдэг. 1984 онд төрсөн. Мэдүүлэг өгөхдөө айсандаа болоод 1990 он гээд хэлчихсэн юм шиг байна лээ. Хүүгээ хэлмэгдчихлээ л гэж бодож байна.

-Таны хэд дэх хүүхэд вэ?

-Хамгийн том хүү. Би долоон хүүхэдтэй өрх толгойлсон эмэгтэй.

-Өмгөөлөгч авсан уу?

-Орцны жижүүр хийж хэдэн төгрөг олдог болохоор мөнгө төгрөг байхгүй. Өмгөөлөгч авч чадаагүй байгаа. Тэгж байгаад авна.

-Хүний эрхийн хороонд гаргасан өргөдлийнхөө хариуг авсан уу?

-Аваагүй. Энэ баасан гаригт ирээрэй гэсэн.

дугаар 145/464.465/